UMongameli Emmerson Mnangagwa ngoLwesine ucele izizalwane zeZimbabwe ezihlala kwele South Africa ukuthi zibuyele ekhaya ziyevula amabhizimusi.
Wethule lokhu emhlanganweni awenze edolobheni lePretoria obekulabantu abaphephela kulelolizwe labaqhuba amabhizimusi.
Amakhulu lamakhulu ezizalwane zeZimbabwe abathe gwaqa esigodlweni sommeli weZimbabwe eSouth Africa ukuzolalela uMnangagwa ekhuluma labo okwakuqala njengomongameli welizwe.
UMnangagwa unxuse abebebuthene laba abagoqela osomabhizimusi, abenhlanganiso zikazulu, inkonkeli zomdabu labantu makhaza ukuthi babuye ekhaya bezosungula inhlelo zamabhizimusi.
“Ngithanda ukuthi mina ngilalo ithemba. Abaphathintambo bami balalo ithemba. Sekusetshenzwa akusadlalwa. Izinto zeziguqukile. Khathesi ma kungathiwa qonda kwesokhohlo yilokho. Kungathiwa qonda kwesokudla yilokho.”
UMnangagwa uthe uhulumende wakhe uphakathi kokulungisa eminye imithetho ebengumgoqo kulabo abafuna ukusungula amabhizimusi eZimbabwe. Uthe indawo ezibalisa ezokulima, ezokwenjiwa, ukulungiswa kwemigwaqo lezipolo zesitimela zilamathuba amakhulu okusungula amabhizimusi.
Ukunxusa kukamongameli Mnangagwa okokuthi iZimbabwe isivuliwe kuloba ngubani ofuna ukuzosungula amabhizimusi, lwemukelwe ngenjabulo enkulu yizizalwane zeZimbabwe.
Usomabhizimusi weZimbabwe, uNkosazana Dorriane Sithole, okhokhela inkampani enza impahla zokugqoka eye House of Havilah, ubethabe emanzi te ngemva kwenkulumo kaMnangagwa.
“Ngiyathaba ngiyajabula ukuba lapha lamhlanje. I’m so excited about what was happening in this place. So, sizongena eZimbabwe and we are going to be available to everyone. Siyazi ukuthi sekuvuleke amasango ukuthi singene lathi sense ibusiness sibone ukuthi kuhamba njani lapho.”
Umgcinisihlalo wenhlanganiso ekhankasela ukusungulwa kwamabhizimusi eZimbabwe, uMnu. Marshall Sankara, laye ulwemukele ngenjabulo lolunxuso wathi bazasebenza gadalala ukuzingela abamabhizimusi abazahlanyela izigidi zamadola eZimbabwe.
“Sithi siyajabula ngempela ngokuba umongameli usimemile ukuthi sikwazi ukuthi nathi si participate ukwakha ilizwe lethu. Sithi size ngobunengi bethu simsekela. Sithi sizokwazi ukuthi sithuthukise iZimbabwe again.”
Esinye isizalwane seZimbabwe, uMnu. Moses Ndlovu, uthe uthokoziswe kakhulu ngamazwi kaMnangagwa ukuthi lalabo abasuka ekhaya besetheswa amacala amanye abangawaziyo kabeze bakhe ilizwe.
“Siyajabula ngento ekhulunywe ngoxolelwano, siqale kutsha phansi. Bakhona abanye abayiziphepheli, abanye ngendaba zempi, abanye babaleka ngokuthi kade bebhala bengamajournalist, abanye ngendaba zomnotho. Uthi uyaxolela futhi ucela uxolo, lathi simxolele njengabantu beZimbabwe. Siqale katsha phansi. Vele kufanele sense njalo ukuthi sakhe ilizwe kahle kufanele sixolelane.”
Umhlangano lo ubuqoqwe yiwofisi yomeli weZimbabwe kweleSouth Africa.
