amalinks wokungena

Umqeqetshi weBosso Uthi Babuthundi Abagadli Bakhe


Umqeqetshi weHighalnders uErol Akbay.

Umqeqetshi weqembu lomdlalo wenguqu ele Highlanders, uErol Akbay, ukhala ngobuthundu babagadli bakhe ngemva kokunqotshwa kweqembu le Bosso ngele Shabanie Mine emdlalweni weviki lesibili kusigaba se Castle Premier Soccer League.

Ekhuluma lentatheli zemidlalo ekupheleni komdlalo wangeSonto, uAkbay uthe abafana bakhe bayaligiqa kuhle ibhola kodwa okudanisayo yikuba kabalitshayeli emambuleni.

“Inkinga yethu yikuthi kasihlohli, singahlohla kuphela yonke into iyabe isilungile. Sicine sesithola ired card ngento ezingelangqondo njalo lokho kwenze ukuba sicine sisenza untshintsho ebesingazimiselanga ukulwenza sasesidliwa. Besilamathuba okuhlohla, silamathuba okunqoba kodwa asiwasebenzisanga ngendlela efaneleyo.”

Iqembu le Highlanders linqotshwe nge 1 ka nya liqembu le Shabanie Mine okuyimpumela elitshiye lihlezi endaweni yesikhombisa engalaneni yemiklomelo lilemiklomelo emithathu.

Phezu kwengalane kutholakala amaqembu ezimbamgodi iqembu le Ngezi Platinum Stars kanye leqembu le FC Platinum wona alemiklomelo eyisithupha iqembu ngalinye njengoba kuyiwo womabili asenelise ukunqoba kumidlalo emibili esidlalwe lonyaka kusigaba se PSL.

Iqembu le Ngezi Platinum linqobe ele Hwange nge 3 ka nya kuthi ele FC Platinum lona litshaye ele Bantu Rovers nge 3 ka 2.

Iqembu eliphethe isicoco se PSL ele Caps United lihlezi kundawo yesithathu lilemiklomelo emine ngemva kokunqoba ele Harare City nge 2 ka 1. Kundawo yesine kuleqembu le Shabanie Mine lalo elilemiklomelo emine kuthi endaweni yesihlanu kuleqembu le Yadah lona elinqobe ele ZPC Kariba nge 1 ka nya.

Iqembu le Chicken Inn lona elinqotshwe nge 2 ka 1 liqembu le Bulawayo City lihlezi endaweni yesithupha lilemiklomelo emithathu kuthi ngemva kwalo kuleqembu le Highlanders kuze ele Black Rhinos lona elitshaye ele Chapungu nge 1 ka nya ikanti amanye amaqembu lawo alemiklomelo emithathu ngabalisa ele ZPC Kariba kanye lele Bulawayo City.

Endaweni yetshumi lanye kuleqembu le Triangle lona elibe ngutshiki lobhanqa 2 ka 2 leqembu le Dynamos kuthi ele Tsholotsho lona elibe ngutshiki lobhanqa 1 ka 1 lele How Mine lisendaweni yetshumi lambili njalo womabili lawa maqembu alemiklomelo emibili.

Endaweni yetshumi lantathu kuhlezi iqembu le Dynamos lona elilomklomelo owodwa okulinani eliphethwe ngamaqembu ahlezi ngaphansi kwalo abalisa ele Harare City, ele How Mine, ele Chapungu, ele Hwange ikanti iqembu elijeke amanye ele Bantu Rovers alikabi lomklomelo ngemva kokudliwa emidlalweni emibili eseliyidlale lonyaka kusigaba se PSL.

Facebook Forum

XS
SM
MD
LG