amalinks wokungena

Breaking News

Umanyano weEuropean Union Uthakazelela Ukunxuswa yiZimbabwe Ukuthi Uhlolisise Ezokhetho Oluzayo


Umanyano weEuropean Union (EU) uzathumela iqula lawo eZimbabwe ngoMvulo ukuzehlola amalungiselelo okhetho ngemva kokunxuswa okusemthethweni nguhulumende weZimbabwe.

Umeli weEuropean Union eZimbabwe, uMnu. Phillipe Van Damme, uthi yinto ejabulisayo ukuthi umanyano wakhe umenywe nguhulumende ukuthi athumele abantu abazehlola ukuthi ukhetho lwalonyaka luqhutshwa njani.

Lokhu ngokwakuqala eminyakeni phose elitshumi lanhlanu ukuthi iEU ivunyelwe ukuzebona ngokuqhutshwa kokhetho eZimbabwe ngemva kokuvinjwa nguMnu. Robert Mugabe esangumongameli welizwe ngomnyaka ka2002.

Ekhuluma leStudio 7 ngoLwesihlanu, uAmbassador Van Damme, uthe iEU isithumele iqula elizafika elizweni ngoMvulo elizakwandulela iqula elikhulu elizakuba selizweni ngesikhathi sokhetho, lona athi lizafika sokusele inyanga ezimbili ukuthi ukhetho lwenziwe.

UVan Damme uthi iqula elifika ngoMvulo leli lizacwayisisa ukuthi umumo ulungele yini ukuthi kuqhutshwe ukhetho olukhululekileyo njalo olungeladlakela.

Uthi ngokumema abahloli beEU, uhulumende wenze kuhle kakhulu, njalo uthi bakhangelele ukuthi ubudlelwano phakathi kwamazwe eEurope leleZimbabwe buqhubeke busiba buhle.

Evumelana loVan Damme, umeli weleBhilithani eZimbabwe, uAmbassador Catriona Laing, uthe amalungiselelo okhetho ekhanya eqale kuhle kakhulu. Wengeze wathi bayathokoza ngokunxuswa kwabahloli bokhetho abasuka eEU.

Osokusele yikuthi ukhetho lolu luqhutshwe ngokuthula, kutsho uAmbassador Laing.

Umanyano weSouthern African Development Community lawo ulequla eliselizweni elihlola amalungiselelo okhetho. Iqula leli lifike elizweni ekuqaleni kweviki.

Ikhomishini ebona ngokuqhutshwa kokhetho iZimbabwe Electoral Commission ithi ukhetho kumele lwenziwe phakathi kwenyanga kaNtulikazi loNcwabakazi.

Umgcinisihlalo weZapu ezansi yeMaNdebeleni, uMnu Mathew Sibanda, uthi kwezinye indawo zelizwe abantu bayethuselwa ngabezombusazwe.

Abantu abanengi baqhubeka bebhalisela ukuvota emahofisini eZEC ezigabeni zonke zelizwe. Phakathi kwamaviki ambalwa edluleyo, iZEC ithi besokubhalise abazinkulungwane ezimbili phezu kwabayizigidi ezinhlanu phose lengxenye ababhalise ngesikhathi ikomishini le isajonga uzulu lapho ahlala khona.

Facebook Forum

XS
SM
MD
LG