amalinks wokungena

Lokhe Evalelwe Esitokisini uEvan Mawarire


UMfundisi Evan Mawarire ulokhe evalelwe entilongweni.

UMfundisi Evan Mawarire we #ThisFlag ngoMvulo uphiwe imvumo yokuba athoniswe esuka ngekhaya kudaba lokuthi unakanelwa ukuthi wayefuna ukukhipha uhulumende ngamandla lokubangela ingxabangxoza lokutshotshozela abantu ukuthi bakhiphe uhulumende weZimbabwe.

UMawarire umelele lokuthoniswa ukubotshwa kwakhe ngempelaviki eHarare lapho ayenze khona ivideo esola ngokuhlupha kwamafutha emote elizweni leZimbabwe lokuhlupha osokusenza imali elizweni.

Lokhu kuvezwe lidale elikhulu lomthethwandaba ele High Court eHarare lapho uMawarire akade esima phambi kukamahluli, uPatricia Chigumba, omnikeze imvumo yokuthoniswa evela ngekhaya.

Udaba akade eletheswa ngoMvulo ngolwanyakenye kuthi olwangempelaviki akaluthoniswa.

UMawarire wetheswa icala lokufuna ukukhipha uhulumende wabantu (subverting a constitutionally elected government) lelokufuna ukubangela ingxabangxoza elizweni etshotshozela abantu ukuthi benze udlakela (inciting public violence).

Lokhu kuza ngemva kokuba wenza amavideo ngomnyaka ophelileyo esola ngomthetho we Statutory Instrument 64, esola ukwethulelwe uzulu ama bond notes, ubugwelegwele lapho enza ukuba abantu bahlale emzini yabo mhlaka 6 Ntulikazi.

UMawarire ulandulile amacala la awetheswayo, kuthi igqwetha lakhe, uMnu. Harrison Nkomo, uthe lokho akwenzayo kuvunyezwa yisisekelo sombuso selizwe.

Ekhuluma lentathelizindaba namhlanje eHarare iqwetha lakhe uNkomo uthe udaba akade elumele edale ngoMvulo kalulani lokubotshwa kwakhe ngempelaviki lapho abotshwe esenkozweni yakhe ye His Generation Church eHarare.

Wengeze esithi ulethemba lokuthi udaba lwakhe lokubotshwa ngeSonto luzakwesulwa ngenxa yokuthi isisekelo sombuso kasivumeli umuntu ukuthi abesesitokisini okwamahola adlula amatshumi amane lesitshiyangalombili – 48 hours.

Igqwetha elibona ngezesisekelo sombuso, uNkosikazi Dephane Jena, uthe kuyathokozisisa ukuthi umahluli Chigumba usebenzise umthetho njengokuba kwawo.

Ingcitshi ebona ngezombusazwe, uMnu. Bekezela Gumbo, uthe sokusobala ukuthi uhulumende ufuna ukungcindezela amalungelo abantu.

Ilizwe leZimbabwe libhekane lendubo ezinengi osokubangele amaqenjana asebenzisa imitshina yakulezinsuku (social media) batshinga ngalokhu.

UMawarire ngomunye walabo abalensolo kodwa ubhekane lokubotshwa okwenza ukuba abalekele kweleMelika kumunyaka ophelileyo wasephenduka lonyaka kodwa wahle wabotshwa esetheswa amacala okufuna ukukhipha uhulumende.

Facebook Forum

XS
SM
MD
LG