amalinks wokungena

Breaking News

Mutsvangwa: Ngamanga Aluhlaza Tshoko Ukuthi Kulokuxokozela Kwezombangwazwe eZimbabwe


Information Minister Monica Mutsvangwa
Information Minister Monica Mutsvangwa

Uhulumende wakwele Zimbabwe uthi ngamanga aluhlaza tshoko ukuthi kulokuxokozela okumangalisayo elizweni okuthiwa kubotshwa abantu mahlayana nguhulumende kaMongameli Emmerson Mnangagwa.

UNkosikazi Monica Mutsvangwa, umphathintambo wohlangothi olubona ngokwethulwa kwemibiko kuhulumende, wethule umbiko ngoLwesine othi lezithunywa zika Mongameli Cyril Ramaphosa ezafika elizweni ngoMvulo zazithunywe kuMnangagwa hatshi abanye abantu, amabandla aphikisayo lozulu jikelele.

Uthi uNkosikazi Baleka Mbete, uDokotela Sydney Mufamadi loMnu. Ngoako Ramatlhodi babethwele umbiko abawunikwa nguRamaphosa okwakumele bawunike uMnangagwa njalo lomongameli wakwele Zimbabwe wawuphendula wawunike izithunywa lezi.

Uthi kuyamangalisa okwethulwa ngamabandla aphikisayo, inhlanganiso ezizimeleyo kanye lamanye amalunga ebandla leAfrican National Congress abathi sokonakela eZimbabwe kulandela imizamo yabantu mhlaka 31 Ntulikazi eyokuqoqa ukutshengisela emigwaqweni besola ubukhohlakali lokunye.

UMutsvangwa uthi okuveza ukuthi akulakuxokozela elizweni yikuthi akuladaba lweZimbabwe oluphanyekwe kunhlangothi ezibona ngezomvikela lezombangwazwe kuhlanganiso ezigoqela eyeSouthern African Development Community leAfrican Union.

Kodwa abaphikisayo bathi sokuzalele ingwe kwele Zimbabwe okulabantu ababotshwe mahlayana nguhulumende kaMnangagwa othuma njalo abezomvikela ukuthi bathumbe abaphikisa uhulumende.

Amalunga ebandla leAfrican National Congress, uNkosazana Lindiwe Zulu loMnu. Acie Magashule, bathi eleZimbabwe lihluphekile.

XS
SM
MD
LG