Amapholisa avimbe umkhosi obuqoqwelwe ukunanza isikhumbuzo seGukurahundi koBulawayo kodwa idale leHigh Court liphe isinqumo sokuthi iBhetshu Likazulu lezakhamizi bananze ilanga lomanyano we Unity Accord ngokukhumbula abantu ababulawa ngesikhathi sombhuqazwe weFifth Brigade eStanley Square eMakokoba.
Amagqwetha amele Ibhetshu Likazulu, uMnu. Matshobana Ncube loMnu. Nqobani Sithole, achasisele uzulu ukuthi kumele isinqumo sikamahluli uJustice Francis Acela, kumele silandelwe.
Abenhlanganiso ye Bhetshu Likazulu kade sebeleminyaka phose eyedlula emihlanu besalelwa ngamapholisa ukuthi bananze ilanga leUnity Day.
UMongameli weZAPU, uMnu. Dumiso Dabengwa, uchaze ukuba okwenziwe ngamapholisa ngoLwesine akwehlukananga lokwenziwa ngamapholisa abamhlophe ngesikhathi sombuso wabo okwabangela impi yenkululeko.
UDabengwa uthe iZAPU yavuma ukungenga kumanyano weUnity Accord ukuzwe kumiswe ukubulawa kwabantu nguMongameli Robert Mugabe levuyo leFifth Brigade.
Lokhu kuvezwa sobala lugwalo lukamuyi uCephas Msipa owayesejele ebotshelwe ukuba yinkokheli yeZAPU uMugabe owayesithi ikhuthaza amalwecatsha ayethwalele uhulumende wakhe izikhali.
Owake waba ngukhansila wakoBulawayo, uMnu. Michael Bathandi Mpofu, uthe amapholisa eZimbabwe awehlukananga lamapholisa ayizolo njalo ubakhuthaze ukuba ngokokucina ukuvimba abantu ngoba ilanga lalamuhla ayisilo lokujabula kodwa ngelokukhalela abantu ababulawa nguhulumende.
Olwela amalungelo oluntu, uMnu. Thema Chiveya, uthe akusoze kubelokuthula eZimbabwe nxa uhulumende eqhubekela phambili ngokungahloniphi ilungelo likazulu.
UMnu. Hloniphani Ncube unobhala webandla leMthwakazi Republican Party uchaze ukuba ababuyeli emuva nxa abakujongileyo kungakafezeki.
Inhlanganiso ezinengi eMatabeleland zibuye emhlanganweni lo ngobunengi bazo zizokhala lozulu ngokwenza ukuthi kubelesivumelwano se Unity Accord.