amalinks wokungena

Breaking News

'Kumele Ukungahlawuliswa Kwabantu Ezibhedlela Kusekelwa Ngumthetho Wezempilakahle'


Ingcwethi kwezempilakahle kanye lozulu bathi inhlelo zabezempilakahle ezikhuluma ngokungahlawuliswa kwabakunhlangothi ezithize akusoze kusebenze nxa ungekho umthetho okusekelayo lokho.

Ukugqitshwa komsebenzi wokulungiswa komthetho wePublic Health Act ka1924 kanye lokutholiswa kwemali kunhlangothi ezimele zisize kulokho kuyiyona ndlela kuphela ezosiza ukufeza lezinhlelo zokuba bangaze bahlawuliswa abantwana abaleminyaka engaphansi kwemihlanu, asebeluphele kanye labesifazane ngesikhathi bezithwele lapho beye ezibhedlela zikahulumende.

Lokhu kuza ngemva kokuba abogatsha lwezempilakahle belobele iziphathamandla kuzibhedlela zikahulumende, ukuzikhumbuza ngaloluhlelo oluvumela ukwelatshwa kwabakulezi nhlangothi zontathu kungela nhlawulo.

Ingcwethi kwezempilakahle zithi kuzokwenziwa kanjani lokho njengoba lemali eyabelwa uhlangothi lwezempilakahle, incane kakhulu.

Umgcinisihlalo wekhomidhi ebona ngezempilakahle edale lephalamende, uDr. Ruth Labode, uthi okudingwa yiloluhlangothi, yikulungisisa umthetho we Public Health Act, owabekwa ngomnyaka ka 1924, ube lenhlangothi ezisekela lelinyathelo.

Okudanisayo uDr. Labode ethi lanxa le iBill esikhona kade yalotshwa lokhe lisalindele ukuba lenziwe kube ngumthetho, uzulu eqhubeka ebhekana lenkinga kwezempilakahle.

Unobhala wogatsha lwezempilakahle, uDr. Gerald Gwinji, uthi kunengi okuzolungisiswa yilomthetho we Public Health Act ungaba khona.

Kodwa uzulu ethi akukho okutsha kulokho bebona ukukhunjuzwa kwalezi ziphathamandla zezibhedlela zikahulumende njengendlela nje yokubabamba abantu amehlo, besazi mhlophe ukuba isimo kwezomnotho singakuvumeli lokho.

Asebeluphele laba okubalisa unkosikazi Viola Ndabambi oleminyaka engamatshumi ayisikhombisa yokuzalwa (70), upha umbono wakhe kuloludaba.

Abakhubazekileyo ababalisa uMnu. Hillary Mlambo bathi uhlangothi lwabo kalwaziswanga ngombiko lo njalo kalikwazi lutho ngencwadi esivunjululwa ukukhumbuza iziphathamandla kwezokuba ngobani abakunhlangothi ezimele zitholiswe usizo lapho ziye ezibhedlela zikahulumende.

Belikhangelelwe ukuba libe selingeniswe edale lephalamende umnyaka ka2017 ungakapheli leli Bill le Public Health lenziwe kube ngumthetho kusiyagqitshwa umsebenzi walelidale lesitshiyagalombili (8th Parliament ) kodwa akusabanga njalo.

Ekuvulweni kwesigaba sokucina sedale lephalamende, bengumongameli ngaleso sikhathi, umnumzana Robert Mugabe akazange alibethe leli Bill njengelinye lama Bill okumele litshutshiswe lidale kulesi sigaba sakucina.

XS
SM
MD
LG