Kambe ngowuphi umdlali weqembu le Highlanders obona edlale kahle lonyaka? Iqembu le Boss linxusa abalandeli balo ukuba baphatheke kuhlelo lokukhetha abadlali baleliqembu abadlale kuhle lonyaka.
Iqembu le Highlanders lonyaka livuselele uhlelo lokupha imivuzo abadlali abadlale kuhle ngemva kweminyaka emithathu loluhlelo lungenziwa.
Imivuzo ezaphiwa abadlali ngegoqela oweSupporters’ Player of the Year njalo abalandeli beqembu le Bosso yibo abalomlandu wokukhetha lumdlali.
Ophethe isikhundla sokuba yisikhulumeli seqembu le Highlanders uNkosazana uKwazinkosi Hlabangana uthi amafomu azasentshenziswa ngabalandeli beBosso ukukhetha abadlali abaqhube kuhle lonyaka asetholakala ehofisini yaleliqembu.
Sizaba lama awards mhlaka 2 December njalo kulesicoco ese Supporters’ Player of the Year. Indlela okuvotwa ngayo yikuba abalandeli beqembu kumele babuye ehofisini bephethe i$1 eyokuthenga ifomu lapho abazaloba khona umdlali abamfunayo kuthi thina ehofisini sesihlanganisa inani lama fomu ukuze sibone ukuba nguphi umdlali olavoti amanengi.
Ezinye izicoco ezizaphiwa abadlali abadlale kuhle lonyaka ngezigoqela eseTop Goal Scorer kanye lese Most Improved Player ikanti lomdlali osedlalele iqembu leHighlanders okweminyaka eminengi uErick Mudzingwa laye uzathola umvuzo wokuba yi Longest Serving Player.
Kwezinye indaba ezimayelana lomdlalo wenguqu kusasa ngoMgqibelo amaqembu ezimbamgodi athi ele Ngezi Platinum kanye lele FC Platinum azadibana kufinal eyenkezo ye Chibuku Super Cup ezaqhutshelwa enkundleni ye Baobab.
Lumdlalo uzaqala ngehola lesibili emini njalo abalandeli bomdlalo wenguqu balakho ukuwulandela kumabonakude we Supersport.
Iqembu elizaphakamisa inkezo lizathola inkulungwane ezingamatshumi ayisikhombisa lanhlanu kuthi elizanqotshwa ku final lizathola inkulungwane ezingamatshumi amahlanu.
Kusasa ngoMgqibelo njalo iqembu elimela isizwe emdlalweni wenguqu elama Warriors lizangqikilana lele Zambia emdlalweni wokuzwana amandla ozaqhutshelwa enkundleni yeNational Sports Stadium.
Iqembu lama Warriors yilo lodwa elizamela uhlangothi lwezansi yezwekazi laseAfrica kumncintiswano we Africa Cup of Nations elizweni lase Gabon ekuqaleni komnyaka ozayo.