amalinks wokungena

Isigwebo Sodlakela: IPSL Ihlawulisa iBosso $4,000 Iphinde Inike Imiklomelo iDynamos

  • Joseph Njanji

UThomas Kusosa, uMunyaradzi Majoni loEdgar Rumeck emdlalweni weHighlanders leDynamos owabalodlakela.

Inhlanganiso ye Premier Soccer League (PSL) isijezise iqembu le Highlanders ngokunikeza iqembu le Dynamos yonke imiklomelo eyomdlalo ongasafikanga emaphethelweni ngenyanga edluleyo ekaNkwenkwezi.

Inhlanganiso ye PSL ilaye ukuba phezu kokuba iqembu le Highlanders lilahlekelwe yimiklomelo, kuzamele lihlawule inkulungwane ezine zamadola njengesijeziso esokuba abalandeli baleliqembu badala ukuba umdlalo owawuphakathi kweqembu leli lele Dynamos ungafiki emaphethelweni.

Abalandeli beqembu le Highlanders bajikijela umsekeli kanompembe uThomas Kusosa sekusele imizuzu emine ukuba kuyehlatshwa ikhefu umdlalo wahle waphelela lapho.

Abalandeli laba bebecunulwe yikuba uKusosa akazange aphakamise iflegi yakhe ngesikhathi umgadli weqembu le Dynamos uChristian Epoupa ehlohla igoli elalilinganisa njengoba iqembu le Highlanders laliqale ukuhlohla lihlohlelwa nguRahman Kutsanzira.

Kusenjalo, umgadli weqembu le Highlanders uRodreck Mutuma uze wakhumbula ukuhlohla lapho elitshayela emambuleni lapho iqembu lakhe linqoba ele Triangle ngeSonto.

UMutuma utshayele emambuleni igoli lesibili eleqembu le Highlanders ngemva kokuba eke wakhutha amakhekhe ambalwa. Kuthe ngemva komdlalo lumgadli uveze ithemba elokuba uzaqhubekela phambili elithela emambuleni njengoba kuyikho akuqhatshelweyo.

“Mina ngingumgadli njalo kungumsebenzi wami ukuba ngihlohle amagoli amanengi. Umqeqetshi wami ulakho angitshaela khona ukuba yikho akukhangelele kimi njalo imidlalo isaseminengi esizayidlala lonyaka.”

Iqembu leHighlanders lithe ngokunqoba kwalo ngeSonto lakhuphula inani lemiklomelo elilayo yaya kumatshumi amabili njalo lilingana lele Dynamos lele FC Platinum kusithi ele Dynamos lihlezi endaweni yesithupha kuthi ele FC Platinum lisendaweni yesikhombisa ikanti ele Highlanders lisendaweni yethoba minwe mbili.

Facebook Forum

XS
SM
MD
LG