amalinks wokungena

Breaking News

Nhlanhla Dube: Lonyaka Kumele iBosso Itshaye Kuzwele


UNhlanhla Dube

Isiphathamandla seqembu lenguqu ele Highlanders, uNhlanhla Dube uthi lonyaka bazalwisa ukuphakamisa zonke inkezo ezikhona elizweni esigabeni sePremier Soccer League.

Ekhuluma lentathelizindaba zemidlalo namhla emini uDube uthe nyakenye bekungumnyaka owokuvuselela isiko obekugoqela ukufundisa abadlali ukuba kutshoni ukudlalela iqembu le Highlanders kanye lokufundisa abadlali laba lendlela leliqembu elidlala ngayo enkundleni.

Uqhubekele phambili wathi leliqembu alingeke liyale lilokhu limi ndawonye njalo kumele lokhu kukhanye ngendlela elidlala ngayo lonyaka.

“Lonyaka kuzamele sithi singangena enkundleni sisebenze gadalala kuthonte izithukuthuku sifinyelele kuma final amanengi njalo nxa kuvuma siphakamise inkezo lezo.

Lonyaka kumele sitshengisele ukuba sileqembu eliqinileyo elenelisa ukumisana lamanye adlala kusigaba saphezulu ngoba ngaleyo ndlela kuzabonakala ukuba kulengqubela phambili eqenjini lethu.”

Iqembu leHighlanders nyakenye liphutshe imidlalo yalo lihlezi endaweni yesihlanu engalaneni yemiklomelo ngemva kwentshantshu zanyakenye iqembu le FC Platinum kuthi endaweni yesibili bekuleqembu le Ngezi Platinum kuthi endaweni yesithathu bekuleqembu le Chicken Inn ikanti endaweni yesine bekuleqembu le Triangle.

Inkokheli zeqembu le Bosso zidinge abadlali abambalwa abalolwazi lokudlala kusigaba saphezulu ababalisa uNqobizitha Masuku, uBukhosi Sibanda kanye lo Prince Dube ukuthi bazophathisa abadlali balo abasakhulayo njalo lokhu kwenze abalandeli bomdlalo wenguqu belikhangelele njengelinye lamaqembu aqine okwamagama lonyaka.

Loba kunjalo amalungiselelo alo awokuqala kwemidlalo yeligi awasahambanga ngemfanelo njengoba abadlali beke bakhalala ukuzilolonga okwamaviki amathathu bekhonona ngokungatholi kwabo iholo lenyanga ka Zibandlela leka Nhlolanja.

Umqeqetshi weqembu le Highlanders uMadinda Ndlovu akayenelisinga ukungena umhlangano wanamhla lentatheli zemidlalo kodwa uDube uthe balethemba elokuba kuyathi kufika umdlalo wesine abafana sebeqine njengabadlali bamanye amaqembu abangazange bephazamiseke kumalungiselelo abo.

Imidlalo yalonyaka eye Premier Soccer League iqala kusasa kodwa iqembu le Highlanders lizaqala ukudlala ngoMgqibelo lapho elizavakatshela khona iqembu le Black Rhinos esigodlweni.

'Kumele Sinqobe Amanye Amaqembu Okuzwayo Lonyaka'
please wait

No media source currently available

0:00 0:02:15 0:00

Facebook Forum

XS
SM
MD
LG