amalinks wokungena

Abalandeli beBosso Bafuna uPeter Dube Owaxotshwa yiZIFA Abakhokhele

  • Joseph Njanji

Umgcinisihlalo weHighlanders FC njalo lowenhlanganiso ye Premier Soccer League uMnumzana, Peter Dube, lesiphathamandla salinhlanganiso uMnu. Elisha Mandireva.

Abalandeli beqembu le Highlanders bathi bafuna umgcinisihlalo weqembu leli uPeter Dube aphenduke esihlalweni sakhe kungensuku zatshwala.

Abalandeli beqembu le Highlanders baveze ukungathokozi kwabo phezu kwendlela inkokheli yaleliqembu ephethe ngayo udaba lokumiswa umsebenzi okwenziwa umgcinisihlalo waleliqembu uPeter Dube yinhlanganiso yeZifa nyakenye.

Ekhuluma ngemva kokuba umgcinisihlalo we board yeHighlanders uMgcini Nkolomi eyethule umbiko wakhe obuqukethe udaba lokumiswa kuka Dube ekuphathekeni kwezemidlalo yiZifa nyakenye, ilunga le Highlanders, uEllington Nsingo usole inkokheli yeHighlanders ngokungaphakami kwayo ilwela uDube.

“Kuyadanisa ukuba umgcinisihlalo we board, le board, le executive behlale phansi bavumelane ukuthi iHighlanders ngcono isale ingela chairman. Umgcinisihlalo wethu axotshwe exotshelwa izinto zePSL lina lihlale phansi badala lithi lakuHighlanders kahambe. Pho ke sizalithemba njani? Umgcinisihlalo wethu siyamfuna lapha isizini iqalisa wakhethwa yithi ngoChiyangwa lo Omega.”

Umgcinisihlalo wenhlanganiso yabalandeli beqembu le Highlanders abahlala edolobheni leVictoria Falls uMorgen Dube, onguye ophanyeke udaba lokumiswa kuka Peter Dube emhlanganweni weAGM, uthi akulunganga ukuba inkonkeli ithathe izinqumo ingabuzanga kubalandeli.

“Ukholo lwethu ngolokuthi nxa umuntu engasenzi kuhle kuHighlanders abantu be Highlanders yibo abathatha isinqumo. Ngenxa yokuthi kasihlonitshwanga sicela ukuthi (uDube) abuyele sisithathe thina isinqumo nxa sivumelana uzahamba. Okwakhathesi amandla ethu sicela lingawesuli.”

Unobhala jikelele weqembu le Highlanders uEmmett Ndlovu uthe yena loludaba luphambi kwabameli beqembu leHighlanders njalo abalandeli bengaboni angani inkokheli yeqembu igoqe izandla akula mizamo eyithathayo.

“Thina imvelo yethu kasikwazi ukuxokozela yikho sathi thina kasibone ukuthi benzani kodwa ngasikhathi sinye sihambisa amaphepha.”

UPeter Dube umiswe ukuba ephatheke kwezemidlalo nyakenye yinhlanganiso ebona ngokuqhutshwa komdlalo wenguqu elizweni eye Zifa ngesikhathi kulokuxhophana phakathi kwalinhlanganiso leye Premier Soccer League yona ebikhokhelwa nguDube ngalesosikhathi.

Kusenjalo iqembu le Highlanders lenelise ukuba livikele ukuba isikwelede salo esifika phose kunkulungwane ezingamakhulu ayithoba minwe mbili singakhuli emnyakeni odluleyo loba nje inani labantu abangene bezolibukela enkundleni lidlala lehlile.

Amalunga aleliqembu athathe isinqumo esokuba kuthi kuphela inyanga kaMabasa leliqembu libe seliqhatshe umuntu ozathatha isikhundla ebesiphethwe nguNdumiso Gumede yena osewathatha umhlalaphansi.

Lonyaka inhlanganiso ye BancABC yona esekela iqembu le Bosso ngemali iphungule ngengxenye imali eyipha leliqembu okutsho ukuba iqembu le Highlanders lizaphiwa inkulungwane ezingamakhulu amabili.

Facebook Forum

XS
SM
MD
LG