Isiphathamandla seqembu lenguqu ele Highlanders, uNhlanhla Dube, uthi imizamo yabo eyokuvikela izehlakalo zobudlwangudlwangu iphumelele kakhulu emdlalweni wabo leqembu le Triangle.
UDube utshayele ihlombe abalandeli beqembu le Highlanders ngendlela abaziphathe ngayo ngeSonto emdlalweni waleliqembu lele Triangle njalo uthi ukusebenzelana kweqembu le Bosso, amapholisa kanye lenhlanganiso ye Premier Soccer League, kuphathise kakhulu ekutheni umdlalo udlalwe uze uphele kungela sehlakalo esiphazamise ukuthula enkundleni.
“Sithanda ukubonga kakhulu abantu ababuyileyo ukuzobukela iqembu labo lokuthi balisekele kungela budlwangudlwangu njalo sithemba ukuba abalandeli beqembu le Highlanders abaqotho bazaqhubeka benceda besiza iqembu ukuthi benqabele labo abazabe befuna ukuba ukucunuka kwabo kucine kudale ukuba kuphoselwe amambodlela lokunye okunjalo.
“Okunye esikwenzileyo yikuba sikhulumisene, sabonisana, sabambisana lamapholisa, lePSL, lomanisipala ukuthi sehlise lokhu okuthengwa kusemambodleleni yikho-ke amanamunede lamanzi bekuthengwa kuthelwe kuma tumbler.”
Olilunga lenhlanganiso ebunjwa ngabasekeli beqembu le Highlanders eye Heart and Soul, uPeacot Hadebe, laye utshayele ihlombe abalandeli baleliqembu ngokuziphatha kwabo kuhle esithi isifiso sakhe yikuba kuhlale kunjalo.
“Aluba vele kuhlala kunje abalandeli beBosso behlale benje bengangeni kubudlwangudlwangu. Okunye nje labo bakubonile ukuba isimo sibi bahle bazitshela ukuba bengaqhubeka ngokwenza okubi bengangena engozini eyokubotshwa. Babonile nje labo bengena enkundleni ukuba isimo sibi ngoba kunengi esikubambileyo emagedini.”
Owadlalela iqembu le Highlanders njalo ongomunye walabo abakhangela ngokwenzakala emasangweni okungena enkundleni, uKainot Luphahla, ugcizelele amazwi kaHadebe awokuba banqabele ukungena kotshwala obunengi kabi abalandeli abakade befuna ukungena labo enkundleni.
“Sisebenzile sibili emagedini lapha sibambe utshwala obunengi mina ngokwami ngibambe izikhwama ezimbili. Kusetshenziwe langale emagedini khonokho okuthiwa itikiti lilinye kalidatshulwa liyasentshenziswa ukungenisa abantu abanengi sikumisile sisebenza laye uNhlanhla Dube.
“Yinto okumele sihlale siyenza, sifuna ukungezelela inani lama marshal abemanengi abanye babephezulu, abanye babe phansi kuthi abanye babe semagedini besebenze ndawonye lamapholisa.”
Iqembu le Highlanders lijeziswe kabuhlungu yinhlanganiso ye PSL ensukwini ezisanda kwedlula ngemva kokutholakala lilecala elokuba abalandeli balo badale ukuba umdlalo walo lele Dynamos ungafiki emaphethelweni ngenyanga edluleyo.
Leliqembu liphinde letheswa elinye njalo icala elifanayo ngemva kokuba umdlalo walo lele FC Platinum lawo ungasafikanga emaphethelweni ensukwini ezisanda kwedlula kodwa impumela yedale elihlalwe kuthonisiswa loludaba ayikazakali.
Inkokheli zeqembu le Highlanders zithi zizalabhela ukuba kwesulwe isigwebo esokuba lemukwe imiklomelo emithathu kanye lokuba lihlawule inkulungwane ezine kuyisijeziso esokuba abalandeli balo yibo abadala ukuba umdlalo walo lele Dynamos ungafiki emaphethelweni.
Iqembu le Bosso lithi kumele kube lokusebenzelana ndawonye phakathi kwazo zonke inhlanganiso eziphatheke emdlalweni wenguqu ukulwisana lobudlwangudlwangu yikho nje ngeSonto edluleyo kube lokubambisana phakathi kwalo lamapholisa, umasipala kanye lenhlanganiso ye PSL.
