Umongameli Ian Khama wakwele Botswana uhlekise abantu ngesikhathi ekhuluma ngoNkosikazi Grace Mugabe esithi mhlawumbe sesifikile isikhathi sokuthi inhlanganiso ethonisa amacala adalwa yinkokheli eye International Criminal Court (ICC) ibumbe idale lamakhosikazi abomongameli atshaya abantu.
Ekhuluma emhlanganweni wokulondolozwa kwelungelo loluntu obumele ungenwe yinkokheli yeTibet, uDalai Lama, ngoLwesine eGaborone, uKhama uthe iBotswana ilenkolo ngomsebenzi owenziwa yi-ICC.
Uqhubeke esithi kunengi okwenzakalayo emhlabeni jikelele okuhambelana lokuhlukuluzwa kwabantu mahlayana wathi mhlawumbe inhlanganiso efana le-ICC kumele icabange ukufaka idale lamakhosikazi abomongameli ahamba etshaya abantukazana.
"Kulokubi okunengi okwenzakalayo emhlabeni yikho njenge Botswana sisekela idale le-ICC. Mhlawumbe iICC kumele icabange ukuba ledale lokuthonisa amakhosikazi abomongameli ahamba etshaya abantukazana."
Ukukhuluma kakhe lokhu kukubekamgceke ukuthi uKhama ukhuluma ekubhekise kuNkosikazi Grace Mugabe owetheswa umlandu wokubhula kabuhlungu eyinye intombazane yakweleSouth Africa ayithola ilabantwabakhe abangabafana endaweni yeSandton.
Omunye weZimbabwe eseGaborone olandela loludaba uDumi Ncube uthi uma unkosikazi Mugabe watshaya lo ntombazana, kulihlazo.
"Ungumuntu omdala njalo likhosikazi lakuqala lesizwe, abantwana kumele ubakhuze kuhle. Lihlazo leli."
Umhlangano kaDalai Lama lapho umongameli Khama akade ekhuluma khona ube ubanjwe ngaphansi kwesihloko esithi 'Ubuntu/Botho' kukhulunywa ngezenzo kanye lesiphatho esenza ubuntu.
Kodwa uLama kade engekho kulomhlangano, kuthiwa kezwa kuhle, njalo ilizwe leChina litshengisele ukungathakazeleli uhambo lolu.