amalinks wokungena

'Kumele Limangalele Abantu Abephula Ilungelo Loluntu'


Inhlanganiso yeHabakkuk Trust ikhuthaza ukuthi kunanzwe ilungelo likazulu.

Izakhamuzi zeSigangatsha eMatobo, esabelweni seMatabeleland South, ezidlula inkulungwane elengxenye zihlangene ngoMgqibelo zinanza ilanga lokulondolozwa kwamalungelo oluntu enkundleni yemidlalo esikolweni seSt. Sebastian Secondary School.

Abekhomishini ebona ngezamalungelo oluntu eZimbabwe bakhuthaze abantu ukuba bamangalele labo abephula amalungelo abo.

UMnu. Japhet Ndabeni Ncube okukhomishini ebona ngelungelo likazulu.
UMnu. Japhet Ndabeni Ncube okukhomishini ebona ngelungelo likazulu.

Umkhosi lo, okade uqoqwe yinhlanganoiso yeHabakkuk Trust, lonyaka ikhethe ukunanza ilanga lamalungelo oluntu koSigangatsha lapho umculi oludumo uNdux Malax Junior labadlalela iqembu leHighlanders bathokozise abantu ngokuhlabelela lemidlalo yebhola.

UMqondisi weHabakkuk Trust, uMnumzana Dumisani Nkomo, ubike ukuba bakhethe koSigangatsha ngoba yindawo ekhatshana njalo ekhangelelwa phansi engela ntuthuko.

Okukhomishini ebona ngelungelo loluntu, uMnu. Japhet Ndabeni Ncube, uthe manengi amalungelo kazulu okumele ananzwe.

Uthe njengekhomishini kabakhethi muntu kodwa munye umuntu abangeke bembize ukuzomkhuza.

Kulamantombazana akade edlala ibhola lezandla.
Kulamantombazana akade edlala ibhola lezandla.

Ukhuthaze abantu ukuba baze bezomangalela abephula amalungelo abanye njalo behlukane lokutshadisa amantombazana esesemancane.

Omele idale leSenate eMatobo, uNkosikazi Sithembile Mlotshwa, ubike ukuba sokumele kubelezijeziso kulabo abephula amalungelo oluntu ngoba akusizi ukubakhuza bengajeziswa.

Umhlabeleli olodumo uNdux Malax Junior uthe ulengoma ezikhuluma ngamalungelo oluntu kodwa aziphiwa amathuba emsakazweni lakumabonakude.

Uthe lokhu kuyadanisa ngoba ukhulumela uzulu.

Osakhulayo KoSigangatsha, uNhloniphani Ndlovu, uthe ukunanzwa kwalelilanga lamalungelo oluntu lonyaka ukujabulele ngoba abantu bafunde okumbalwa esigabeni sakhe.

Abanye abadlali benguqu akade bekumkhosi wokunanza ilungelo loluntu.
Abanye abadlali benguqu akade bekumkhosi wokunanza ilungelo loluntu.

UMqondisi weHihglanders Lengends, uMnu. Earnest Maphepha, ukhuthaze abantu ukuthi bakhangele kakhulu amantombazana bamangalele labo abahlukuluza amantombazana emulini.

Uzulu walumango unanze ilanga leli ngokubukela imidlalo kanye lokuthokoziswa ngumculo kaNdux Junior.

Kubhola lamankazana, Isigangatsha ibhuqe iMalundu ngokuhlohla amabhola ayisificaminwe mbili iMalundu yahlohla amahlanu bathola ibhola lempahla yokugqoka.

ISigangatsha ithole ibhola le impahla yokugqoka kanye lenkezo yokudlala kahle enikwe uBetty Nyoni owayesebenza kunhlanganiso yeHabakkuk Trust kodwa sewatshona.

XS
SM
MD
LG