Inhlanganiso ehlose ukuguqula impilo yabesifazana beZimbabwe abasendaweni ezitshiyeneyo zomhlaba, eyeZim Imbokodo, yethulwe ngokusemthethweni eJohannesburg ngempelaviki.
Abesifazane labesilisa ababesemkhosini wokwethulwa kwale inhlanganiso bebekhangisa ngokunengi abakwenzayo kanti isiqokoqela sendaba bekuyikuthi omama baphiwe amandla lo xhaso kukho konke okuphathelene lempilo yabo.
Bekuyintokozo enkulu kubomama beZimbabwe ababehlangene eHilbrow eJohannesburg ngempelaviki emkhosini wokwethula ngokusemthethweni inhlanganiso yeMbokodo.
Umgciisihlalo wale inhlanganiso uNkosazana Victress mathuthu utshele abebebuthene kulo umkhosi ukuthi inhloso enkulu ngeyokuthi njengabomama bekhande amacelo azakwenza benelise ukusebenzisa loba yiwaphi amathuba abakwatholayo empilweni.
Uthi linhlanganiso ifuna ukuxhasana labesifazana beZimbabwe kukho konke kugoqela kwezempilakahle, ezomendo, ezemfundo, ezamasiko, ezamabhizimusi, ezemisebenzi, ezemisebenzi yezandla kanye lezamatalenta kulabo abalamathalenta abafuna ukuphila ngayo.
Le yinkulumo ethokozisi inengi labesifazana abebekulo umcimbi.
Unobhala obona ngokuqoqwa kwenhlelo zal’inhlanganiso, uNkosazana pretty Ndlovu, utshele iStudio 7 ukuthi kulabesifazana abenengi abasemazweni asebekhombise isifiso sokusungula ingatsha zeMbokodo emazweni abakuwo.
Uthi-ke kulo umcimbi omama bahle bathola ithuba lokukhangisa ngalokhu abakwenzayo.
“Bathengisa into ezineningi ezehlukeneyo. Abanye ngabama tapperware, abanye ngabama forever living, kuyakusiza, kusiza sonke singomama laloba ngubani. Thina into esiyihlosileyo yikusizana singomama.
“Besilesifiso sokuthi mhlawumbe singathola ama sponponsor noma yini, sibe nama projects ngaphakathi. Sinabomama abanengi abangasebenziyo. Abanengi bayazibulala ngenxa yokungasebenzi, so sifisanje ukuthi sibaqoqe sibendawonye bakwazi ukusizakala.”
UNicky S. Ncube Nabaculi beVangeli ocula umculo womdabu uhle wathola ithuba lokuzidingela abalandeli kulo umcimbi.
“Ngijabule kakhulu lana emcimbini we Imbokodo ngoba into abayenzayo omama inhle kakhulu. Kuyathinta abanye ezinhliziyweni ngibone abanye bekhala okutshengisa ukuthi izoba lusizo olukhulu kakhulu. Already seyiqalile vele ukuba lusizo.”
Abesilisa labo bebebanengi bezoxhasa ukusungulwa kwale inhlanganiso. Umnumnzana Arnold Mayibongwe Nkala, owenhlanganiso yamasiko eyeButho leNqama laye ubekulo umcimbi.
“Kuyinto enhle kakhulu ukuthi bahlangane omama. Into engichaze kakhulu yikuthi bonke omama esibabonileyo ngoma asebekhulile okuchaza ukuthi uma bengaheha laba abancane bangene, bazathola vele inhlanganos evuthiweyo ezabafundisa ubumama. Siyazi ukuthi umama yena ma ethuthuka umdeni wonke uyathuthuka.”
Omunye ubaba weZimbabwe umnumnzana Mlungisi Tshabalala laye obekhona uthi omama nxa bengaphiwa amandla kwezomnotho lezokukhokhela kungaphela inhlupho ezinengi eZimbabwe.
“Zinengi izinto abantwana abathe befika la eGoli bazenza. Abanye banatha utshwala, abanye sebekumadrugs. Abantwana liyabona ukuthi kuyaretshwa kwenziwa zonke lezi zinto kodwa ma behlangana bekhuzana bekhuluma ngalezi izinto kuyangijabulisa kakhulu.
“Lathi ma sikhulumisana labobaba sithi madoda asiphatheni kahle amakhosikazi ethu, asiphatheni kahle abantwabethu abesifazana asiphatheni kahle odadewethu.”
Inhlanganiso yeZim Imbokodo ithi okwamanje isizaqala ukuhlala phansi, izwisise inhlupho lendingengo zabomama asebengamalunga ale inhlanganiso, beseke iqala umkhankaso wokubadingela uxhaso abaludingayo ukuze bafinyelele amaphupho apho.
