EleBotswana selazise ukuba selisungula uhlelo lokwehlisa inani labantu abazithola bengasazi ukuba bayinzalo yakuliphi ilizwe, ngokuguqula imithetho ephathelane labantwana abazalwa ngowokuza kanye lesizalwane salelolizwe.
Umphathintambo obona ngeziphathelane lezokuhlala kanye lokungena kwabantu eBotswana, oweImmigration, uNkosikazi Anna Mokgethi, utshele idale lephalamende ukuthi balungisisa umthetho okhangelane lamaphepha okuba yinzalo yakwele Botswana.
Uthi lokhu bakwenza ngokunanzelela ukuba abantwana abazalwa phakathi komzali wokuza kanye loweBotswana, bazithola sebebhekane lodubo lokucina beswela ingwalo zokuba yinzalo yamazwe womabili.
Umthetho wakwele Botswana uthi uma umntwana oyinzalo yalaba bobabili efikisa iminyaka engamatshumi amabili lanye (21), kumele akhethe ngokuloba incwadi, ukuthi ufuna ukuba yinzalo yakuliphi ilizwe. Uma bengayekela ukwenza njalo, kulaphoke abazithola sebengasakwazi ukuthi bawela kuliphi ilizwe.
UNkosikazi Mokgethi uthi kungalesi sizatho sebecabange ukulungisisa lumthetho ukuze lokhu kungakhathazi kwelakusasa.
“Siyamukela ukuguqulwa komthetho ukuze zimise izehlakalo zabantu abangalalizwe abalithi ngelabo.”
Kuladabuka eZimbabwe abanengi abahlala eBotswana abalabantwana laBatswana.
UMnu. Mthabisi Dube uthi uyakuthabela ukuthi umthetho uzalungisiswa ngoba abantwana yibo abazithola besenkingeni.
“Kuyinto eqondileyo ukuthi noma umntwana engazange abhalele uhulumende ekhetha ukuthi ufuna ukuba yinzalo yakuliphi ilizwe, kuzathathwa njengokuthi lokhe beyinzalo yeBotswana, hatshi lokhu ebesikubona akade kusenza abantu becine bengalamaphepha atshengisa ukuthi bangabakuliphi ilizwe.”
Umphathintambo Mokgethi uthi abazithola bengalalizwe balakho ukulungisa lesisimo.
“Abantu laba balevumo yokusilanda ukuthi basungule ukuba yizizalwane zeBotswana.
Umthetho weBotswana ophathelane labantwana abazithola bekulesi simo ubuvele usolwa kakhulu ngabaselizweni, abenhlanganiso zasezwekazi leAfrica kanye lezomhlaba ezifana lomanyano wamazwe womhlaba eyeUnited Nations, ezithi ulenkethabetshabe, ikakhulu kukhangelwa abantwana beziphepheli.