amalinks wokungena

Breaking News

Imitshova Isikhuphule Inhlawulo Yokugada Izimota Ezithwala Uzulu


Chitungwiza Kombis Strike

Abasebenzisa imota ezithwala uzulu emadolobheni bathi abasenelisi ukuya emsebenzini loba ukwethekelala indawo ezitshiyeneyo ngenxa yokukhuphuka kwenhlawulo yokugada imitshova. Lokhu kwenzakala ngemva kokukhwezwa kwentengo yamafutha ezimota nguhulumende.

Abezimotha ezithwala abantu ukusuka emalokitshini besiya enzikini yedolobho leHarare bakhuphule inhlawulo yokugada kulandela ukukhwezwa kwentengo yamafutha ezimota ngempelaviki.

Abahlala emalokitshini anjenge Glenview, Glennorah, Waterfalls leminye sebehlawula amadola ayisithupha - $6 isuka kumadola amane. Kuthi labo abahlala emadolobheni amancane agombolozele iHarare afana leChitungwiza, Norton leRuwa sebehlawula amadola alitshumi -$10 ukuze babuye emsebenzini eHarare.

UMnu. Melusi Sibanda, ohlala eGlenorah, uthi ngelanga sokumele akhokhe amadola alitshumi lane- $14.

Lokhu kugcizelelwe nguNkosikazi Faith Mabhena, owemzini weHardfield, othi usehamba ngeZUPCO ngoba yiyo ayenelisayo. Kodwa ukuze enelise ukugada leyo bhasi kumele avuke emadabukakusa.

Udaba Esilethulelwe NguGibson Bhebhe
please wait

No media source currently available

0:00 0:04:29 0:00


UMnu. Thabani Gumbo, isakhamizi seHarare, uthi akasoli abanini bemitshova kodwa uhulumende.

“Ngeke sasola abamakombi abakhweza intengo yokuhambisa ngoba uhulumende nguye olokhu ekhweza intengo yamafutha ezimota. Akula kuqeda udubo esingakwenza nxa sikhangele ukukhwezwa kwentengo yamafutha ngoba singakhangela asekhwezwa ngempelaviki inye ngayinye. Kustho ukuthi labo kumele basale belemali enelisa ukuthi bathenge amafutha, bahole njalo balungisise imota zabo nxa zingafa kodwa lokhu ngeke bakwenelisa ngentengo ye50 cents.

“Okusalayo yikuthi amakhombi azaqhubeka ekhweza intengo nxa uhulumende engaqhubeka ekhweza amafutha. Nxa uhulumende engazi ukuthi uzaqeda njani udubo olukhona kunotho yelizwe umumo uzaqhubeka usiba mubi njalo angiboni uhulumende lo esenelisa ukulungisa ilizwe”

Isikhulumeli senhlanganiso emela amalungelo ezihambi eyePassengers Association of Zimbabwe, uMnu. Nobert Mafu, uthi uhulumende kumele athengisele abamakombi amafutha alentengo ephansi njengaleyo anikeza ngayo amabhasi kaZUPCO ukuze labo benelise ukwehlisa intengo yokugada.

Abatshayela amakombi bathi baqeda isikhathi eside bemi kundwendwe zokuthola amafutha okuyikho okwenza intengo zabo lazo ziqonge.

Inkampani kahulumende ebona ngokuthenga amafutha elizwe eye Zimbabwe Energy Regulatory Authority ikhweze intengo yamafutha epetulu ngoMvulo isiya kumadola phose alitshumi lanhlanu - $14.90 esuka kwalitshumi lanye - $11.47 ngeviki edluleyo.

Kuthi amafutha ediesel asuke kumadola edlula alitshumi - $11.90 esiya kwalitshumi lanhlanu-$15.

Facebook Forum

XS
SM
MD
LG