amalinks wokungena

Izakhamizi Zidilizelwa Izindlu Ngumuntu Owaziwayo Ongabotshwayo


Eyinye yezindlu ezidilizwe ngabantu okuthiwa bathunywa nguMnu. Shame Mathe.

lzakhamizi zeInsiza North esabelweni seMatabeleland South zikhala ezimathonsi ngoba zithwele nzima ngokutshiselwa imizi, ukutshaywa lokuthathelwa impahla ngomunye undoda obikwa eyisiphathamandla sebandla leZanu PF.

Izakhamizi lezi zithi lamapholisa esigaba ayethuselwa osekubangele ukuba inhlupho zabo ziphelele emoyeni.

Imizi itshisiwe ezinye izindlu zadilika kuthi lempahla yagecwa ngamahloka osekutshiye abantu bekhumbula izolo layo ebingamanga kahle.

Obona ngokukhutshwa kwemibiko kubandla leZAPU, uMnu. Earnest Ndlovu, okhulume ngesikhathi besipha izipho kumuli ezatshiselwa imizi lempahla, usole kakhulu ubudlwangudlwangu osobuqhamuke eInsiza North esithi ibandla elibusayo seliqalile umkhuba walo omubi ngoba sebekhangelane lokhetho lomnyaka ozayo.

Isakhamuzi seNsango, uNkosikazi Alitha Ndlovu, uthe udilizelwe watshiselwa umuzi njalo lezitina zakhe sezithethwe ngabantu abaziyo.

UNkosikazi Siphiwe Nyathi, ongomunye wabatshiselwa imizi, uthe udaba lwakhe useluphanyeke emapholiseni akoBulawayo ngoba awabo ebengelanyathela abalithathayo.

UMnunzana Elson Sibanda isakhamuzi seNsango eInsiza North, ugcizelele okukhulunywa nguNyathi esithi benziwa isihluku bakhangelele ukwakha kodwa kusasenzima ngoba lokhe besethuselwa.

UNkosikazi Silela Nxumalo, unina kaSobhuku uEarnest Nxumalo okuward 24 Village 5 koNsango owadilizelwe umuzi bahlahlela impahla ngamahloka, uthe amalunga ebandla elibusayo lokhe esithi abathokozi ngesikhundla esaphiwa indodana yakhe sobusobhuku nguNduna uMajaha, laye umuzi wakhe wadilizwa lempahla zaganyulwa.

UMlisa kaWard 22, eNsango, uMnu. Elexandra Mnyokeni, uthe okwenzakala eInsiza North yonke lakoNxumalo akukhulumeki njalo ilunga ledale lephalamende, uMnu. Andrew Langa, kehlukane lokuhlukuluza abantu esebenzisa indoda eyaziwa ngokuthi nguMnu. Shame Mathe.

Abantu bakaNduna uMajaha badla imbuya ngoluthi eInsiza North, ngoba imizi edlula amakhulu amahlanu idiliziwe eminye yatshiswa kuthi impahla bayazithathela.

Abantu bayatshaywa kodwa amapholisa awalanyathela abalithathayo.

Imizi ephahle umgwaqo oya eHarare yatshiswa kuthi abanini baxotshwa belengise izandla.
Okhokhela konke lokhu ngumuntu owaziwayo kulumango engumbalisi esikolweni seNsango Primary, uMnu. Shame Mathe.

IStudio 7 izamile ukukhulumisana loMathe kodwa kwehlule ngoba locingo lwakhe belungadojwa.

Facebook Forum

XS
SM
MD
LG