amalinks wokungena

Breaking News

UMnangagwa Uthi Amabandla Aphikisayo Kumele Anqabele Udlakela Ngesikhathi Sokhetho


UMongameli Emmerson Mnangagwa ukhuluma esenkundleni yeNational Sports Stadium eHarare ngoLwesithathu ngosuku lokuthakazelela uzibuse welizwe leZimbabwe.
UMongameli Emmerson Mnangagwa ukhuluma esenkundleni yeNational Sports Stadium eHarare ngoLwesithathu ngosuku lokuthakazelela uzibuse welizwe leZimbabwe.

UMongameli Emmerson Mnangagwa usekhuthaze abamabandla ezombusazwe ukuba behlukane lodlakela.

UMnangagwa wethule lokhu enkundleni yeNational Sports Stadium lapho obekulabantu abanengi abakade bonanza usuku lukazibuse.

Ele Zimbabwe linanze lolusuku okwakuqala, kusukela latholayo uzibuse ngomnyaka ka1980 lingela owayengumongameli Robert Gabriel Mugabe, ohluthunelwe intambo zombuso libutho lawupha uMnangagwa.

UMangagwa utshele uzulu ukuthi akumelanga kubelodlakela lonyaka ngesikhathi sokhetho ngoba ilizwe leZimbabwe lifuna ukuthi ukhetho lolu luphumelele ukwenzela ukuthi luhlonitshwe ngumhlaba wonke jikelele.

Kodwa omunye wenkokheli yamabandla ezombusazwe aphikisayo, uMnu. Nelson Chamisa, okhokhela elinye icele leMDC-T kanye lomanyano we MDC Alliance, uthe okukhulunywa nguMnangagwa kuyize.

UChamisa uthe khona bezokhulumisana laye ngenguquko okumele ibekhona elizweni ezavumela ukuqhutshwa kokhetho olukhululekileyo.

Omunye wabaxotshwa ku Zanu PF ngesikhathi ikhokhelwa nguMugabe, owayeyisikhulumeli salelobandla, uMnu. Rugare Gumbo, uthe kuqakathekile ukuthi abantu bananze usuku lukazibuse.

Bekusobala ukuba owalonyaka umkhosi ubuwehlukile njengoba bekulenkokheli eyehlekuneyo yamabandla okholo lwesiKhrestu okubalisa umkhokheli webandla lamakholwa esiKhristu awe Zimbabwe Assembles Of God Africa uDr. Ezekiel Guti lomkakhe uNkosikazi Eunor Guti, umkhokheli weChurch of Zimbabwe uRight Reverend Morris Brown Gwedegwe kanye lo Reverend Father Patrick Ngwenya oweRoman Catholic Church, Archdioces of Harare.

Uzulu ulibaziswe ngendlela ezehlukeneyo okubalisa imicimbicimbi ebisenziwa ngabasesipholiseni, abantwana besikolo abavelele eDzivaresekwa lokufola kwabakubutho.

Sinye isehlakalo esidanise uzulu obekulomkhosi lapho ababili bama para-troppers behluleke ukwehla kuhle phakathi kwenkundla ngesikhathi bejabulisa uzulu, bawele ngaphandle kwayo.

Kukekwaba lesehlakalo sokuwa kobekhokhela iqula labakubutho ngaphansi kwe Presidential Guard njalo lenkundla lonyaka ibigcwele amavevane.

Owalonyaka umkhosi unanzwe phansi kwesihloko esithi ‘Zimbabwe@38:Socio – Economic Restoration and International Re- Engagement’.

Ungenwe nguzulu ovele kuhlangothi zonke zempilo, iziphathamandla zikahulumende, abammeli bamanye amazwe eZimbabwe, abezokholo kanye labezomvikela.

Omunye wabekade elibazisa uzulu ngumculi olodumo uAlick Macheso leqembu lakhe leOrchestra Mberikwazvo.

Bekulomdlalo njalo wenguqu, iqembu elimela isizwe elama Warriors lidlala lele Zebras lakwele Botswana kumcintiswano wenkezo yePresident Independence Cup.

XS
SM
MD
LG