amalinks wokungena

Breaking News

Kwenziwa Umhlangano Wokuhlolisisa Amalungiselelo Okhetho lweZimbabwe Oluzayo


UMnu. Ngqbutho Mabhena ngomunye wabangene umhlangano wenhlanganiso ezizimele zodwa kwele South Africa.

Inhlanganiso zikazulu weZimbabwe sezikhuthaze ikhomishini ebona ngezokhethoeye Zimbabwe Electoral Commission (ZEC) ukuthi ilungisise ngokuphangisa konke okuphathelane lemithetho yezokhetho logwalo olulamagama abavoti ukuze impumela yokhetho oluzayo yemukeleke.

Lokhu kuphume emhlanganweni walezinhlanganiso owenzelwe eJohannesburg kweleSouth Africa lamhlanje zihluza okumele kwenziwe yiZEC ukuze ukhetho luqhutshwe kuhle.

Umgcinisihlalo wenhlanganiso ye Crisis in Zimbabwe Coalition, uMnu. Rashid Mahiya, uthi njengenhlanganiso zikazulu bakubone kuqakathekile ukuthi bahlangane behlaziya ngokuthi kambe sekwenziwe yini konke okudingeka kwenziwe ukhetho lungakafiki.

Bahlolisisa okwenzakala kwele South Africa.
Bahlolisisa okwenzakala kwele South Africa.

Inengi lezikhulumi kulo umhlangano likhale ngokuthi akucaci ukuthi iZEC izimele yodwakumbe ithatha icele kulolukhetho.

Ukwala kweZEC ukupha inhlanganiso ezimela uzulu ugwalo lwabavoti olweVoters Roll bathikutshengisa ukuthi kukhona okufihlwayo. Lezi inhlanganiso zithi zifuna ukuqatshwa kwalabo abazakhokhela ukhetho kubekwe sobala kwaziwe lokuthi baqatshwe njani njalo ngobani.

Bafuna njalo iZEC yethule imithetho ecacileyo mayelana lokuthi yiphi indlela ezalandelwa ekwethulweni kwempumela yokhetho.

UMahiya uthi indlela ukhetho oluzaqhutshwa ngayo bafuna yethulwe icace.

“Ukuzimela kwekomishini yezokhetho yikho okuzakwenza iqhube umsebenzi wayo ngendlela esuthisa wonke umuntu. Lokho kuzakwenza njalo ukuthi bonke abantu bayethembe likomishini. Okunye njalo ludaba lokucaca kwendlela zokuthenga konke okuzasetshenziswa ekhethweni. Abantu bakhathazekile kakhulu ngokhetho lokuthi kambe kuzakuba lukhetho olwemukelekayo na.”

Igqwetha elilwela amalungelo oluntu, uMnu. Dewa Mavhinga, uthi lobanje besemukela ukuthi lonyaka kungenwa ekhethweni kungela dlakela olufana leminye iminyaka, kunengi okulokhu kungakalungiswa. Uthi zikhona ezinye induna ezilokhu zibamba abantu ngamandla ukuvotela iZANU PF kantike kwezinye indawo kulembiko ethi kulamasotsha akhankasela ibandla lelo bandla.

Abasemhlanganweni wenhlanganiso ezizimele zodwa eJohannesburg.
Abasemhlanganweni wenhlanganiso ezizimele zodwa eJohannesburg.

“Besicela ukuthi amasotsha akhulume ukuthi awasoze angene ku politics zeZimbabwe. Njalo siyacela ukuthi kube lokuthula abantu bengatshayani kuZanu pf loba ku MDC. Njalo siyacela ukuthi uPresident Mnangagwa enze konke ukuthi kube lokuthula nxa singena kuma elections.”

AbeZimbabwe abasemazweni labo bethule okunengi abakhalaza ngakho ngamalungiselelo alolukhetho. Umgcinisihlalo wenhlanganiso ye Zimbabwe Community in South Africa umnumnzana Ngqabutho Mabhena uthi bakhathazekile ukuthi ngemva kokwenqatshelwa kwabantu ukuthi bavote besemazweni ayikho imizamo eyenziwa nguhulumende ukusiza labo ababhalisileyo ukuthi bayevota.

“Okunye esikhala ngakho yikuthi ukhetho luyabe lungoMvulo. NgoMvulo abantu bazabe besemsebenzini. Sekusitsho ukuthi abantu bacele ama leave days ngoMvulo langolweSibili ukuthi bengabi khona emsebenzini besiya vota. Kade kuzaba kuhle ukuthi ukhetho lube ngoMgqibelo okuzakwenza ukuthi abantu abanengi lapha eSouth Africa lakwamanye amazwe aseSADC ababhalise ukuvota bahambe bayovota.”

Inhlanganiso zikazulu lezi zithi kusemandleni eZEC ukulungisisa zonke lezi izinto ngendlela ezakwenza nxa impumela yokhetho isiphumile wonke umuntu ayemukele kungelambuzo loba ukuphikisana laleyo mpumela emthethwandaba.

Facebook Forum

XS
SM
MD
LG