amalinks wokungena

Breaking News

Inkokheli Ikhuthazwa Ukuthi Ilwisane Lobuyanga Kwabesifazane


Inhlanganiso ezizimeleyo zithi akulwisanwe lobuyanga obuzakwenza ukuthi abesifazane bathuthuke.

Abenhlanganiso ezilwela ilungelo labesifazane zikhuthaza inkokheli zamazwe womhlaba okubalisa eleZimbabwe, ukuqinisa imisebenzi yokuthuthukiswa kwabesifazane, ngoba beyibo ababhekana lobunzima obudalwa yibuyanga ukwedlula abesilisa.

Abamele inhlanganiso lezi batshele umhlangano abawenze lentathelizindaba eHarare ngoLwesibili ukuthi kuqakathekile ukuba abezindaba balobe indaba eziphathelene lobuyanga, ngendlela eziveza inkinga ezingumgoqo emizameni yokuthuthukiswa kwabesifazane bona beyibo abahlangana laloludubo ngokuphindiweyo.

Abomanyano wenhlanganiso ezilwela ilungelo labesifazane owe Women's Coalition of Zimbabwe, bathi bakubone kufanele ukusebenzelana labomkhankaso we THE ONE CAMPAIGN, kuhlelo lokuqeda ubuyanga kwabesifazana.

Abe ONE ORGANISATION ezwekazi le Africa, bathi bakubone kumqoka ukusebenzelana lentathelizindaba kule mikhankaso, okuzaphathisa ekuthini uzulu azwisise okwenzakalayo.

Bathi kuyinto edanisayo ukuba intathelizindaba zamazwe awezwekazi le Africa, azila dlabuzane lokubuzisisa inkokheli zalamazwi phezu kokuyabe kuvunyelenwe emihlanganweni abayingenayo endabeni zentuthuko enjenge yabesifazane.

Omunye wabangene lumhlangano eyintathelizindaba laye umnumzana Zuze Zuze, oqhuba imisebenzi yokuloba lokuqondisa imidlalo yokulingisa yamadrama, uthi uncedakele kakhulu ngomhlangano walamuhla njengoba ubengawunanzeleli umahluko okhona phakathi kwendlela ubuyanga obuhlasela ngayo abantu ngokutshiyeneyo kusiya ngokuthi ungowesilisa loba owesifazane.

Okusekelwe ngomunye njalo oyintathelizindaba esebenza izimele, umnumzana Jacob Sibanda.

Ukhala ngesimo esiselizweni uSibanda, ethi lanxa uhulumende eloba izivumelwano phezu kokuthuthukiswa kukazulu ikakhulu abesifazane, kulutshwana okwenziwayo ngokugcweleyo ukukufeza lokho.

Lezinhlanganiso ziveza njalo ukuba zikhethe ukusebenzelana lentathelizindaba njngendlela yokulungiselela imihlangano emikhulu ezakwenziwa lonyaka lakwelizayo okubalisa owe African Union, owe G7 kanye lowomanyano wamazwe womhlaba we United Nations General Assembly.

Zithi lezinhlanganiso, intathelizindaba yizo ezenza kwazakale okwenzakalayo okumayelana lezivumelwano ezilotshwa zinkokheli lezi kule imihlangano.

XS
SM
MD
LG