Abesifazana bananze usuku lwabesifazana olwe International Women’s Day (IWD) koBulawayo bekhokhelwa yinhlanganiso ye Women’s Institute for Leadership (WILD).
Umkhosi lo owenzelwe eBulawayo Club ungenwe ngabesifazana akade bevela endaweni ezitshiyeneyo abagoqela omama abaphatheka kwezombusazwe, omama abamephandleni labasuka emadolobheni, abakumabhizimusi kanye labenhlanganiso ezehlukeneyo.
Kade bexoxa kakhulu ngezokungena kwezombusazwe lenani labomama abangena ephalamende.
Inhlanganiso yeWILD iqoqe lumkhosi ngaphansi kwesihloko esithi “Women’s Empowered for Leadership”. Bekukhuthazwa abesifazana ukuba bangene kwezobukhokheli kungakhathalekile ukuba kungabe kungezombusazwe, ezamabhizimusi lezinye inhlelo ezikhona elizweni ngemizamo yokuqakathekisa imisebenzi lamandla asemuntwini wesifazane.
Obona ngokuqhutshwa kwemibiko kunhlanganiso yeWILD, UNkosikazi Bridgette Ndlovu, uthe kuhle ukusebenza labesifazana ngoba sikhathi sonke baveza ukuhlakanipha kanye lokudala amathuba amahle aletha intuthuko kuzabelo zabo.
Uthe umkhosi wabo wokunanza usuku lwabesifazana kade uhlose ukuthi omama abafisa ukuba sezikhundleni bayenelise ukuthola usizo kulabo abasezikhundleni eziphezulu.
UNkosikazi Priscilla Misihairambwi Mushonga, olilunga ledale lephalamende emele ibandla leMDC ekhokhelwa nguMnu. Welshman Ncube, uthe uhlupho olukhona kwezombusazwe yikuthi omama bathi sebengene ephalamende balibale babe sebephaphama ukhetho soluseduze.
Uthe isisekelo sombuso welizwe silakho ukuguqulwa ukuze inani labomama liyephezulu edale lephalamende.
Ilunga ledale eBeitbgridge, uNkosikazi Tambudzani Mohadi, laye uvumelane loNkosikazi Mushonga esithi kuye ilanga selitshonile.
Uthe sesifikile isikhathi sokuthi abatsha bangene kwezombangazwe ukuze bazi kahle indlelo zamabandla abawafunayo.
UNkosikazi Patricia Tshabalala, olwela amalungelo abasakhulayo, uthe uhlupho olukhona yikhuthi omama bangangena ephalamende abakhulumi ngakho-ke inhlupho zabo zizathatha isikhathi eside ukuthi ziphele.
Lonyaka iZimbabwe ithakazelela usuku lwabomama ngaphansi kwesihloko esithi #Beboldforchange