amalinks wokungena

Breaking News

Izizalwane zeZimbabwe Zesaba Umkhuhlane Osenyameni Osubulele Abantu Abanengi eSouth Africa


La ngama sausages anjengalawo athengiswa kwele South Africa okuthiwa akumelanga adliwe ngoba alomkhuhlane.

Izizalwane zeZimbabwe kwele South Africa zithi seziphilela evalweni ngemva kokuba ugatsha lwezempilakahle lwethule ukuthi umkhuhlane welisteria osubulele abantu abaphose bafike amakhulu amabili uvela ekudleni okugoqela ipolony, Russian sausage lamanye amasausages, ama viennas lezinye inyama ezithengwa vele sezilungele ukudliwa.

Inengi labeZimbabwe abakhulume leStudio 7 bathi besabela ukuthi umkhuhlane welisteria kungenzeka sebelawo loba bazawuthola njengoba ukudla okutholakale kikho igciwane elibangela lumkhuhlane yikho abakudla phose nsukuzonke.

Enkulumeni ayethule kwabezindaba izolo, umphathintambo wogatsha lwezempilakahle umnumnzana Aaron Motsoaledi uthi inhlolisiso esiyenziwe ikhombisa ukuthi umkhuhlane welisteriosis uvele ekudleni okubalisa i polony, russian, sausages, viennas lezinye inyama ezithengwa vele sezilungele ukudliwa, kwatholalaka njalo emagumeni amankampani athile enza lokhu kudla.

“Sikhuthaza umphakathi ukuthi ungadli inhlobo yalezi inyanga ezithengwa vele sezilungele ukudliwa. Kufanele bame ukudla lezo nyama.”

Lokhu sekulethe ukukwesaba kakhulu kuzizalwane zeZimbabwe kweleSouth Africa. Unkosazana Mercy Mvundla uthi besabela kakhulu abantwababo.

“Ingethuse kakhulu lami nginje ngoba abantwana bethu uma beye esikolweni sibalungiselela lokho kudla amapolony, abomavienna, ocheese okuyizinto kakhulu ezilula ukwenziwa, okuthiwa zikulungele ukudliwa okuyikuthi impilo zabantwana zisengozini kakhulu.”

Esinye isizalwane seZimbabwe umnumnzana Greatman Mkhwebu uthi sebesesaba ukudla loba yini eyinyama.

“Sesisesaba ukuthi sithenge ukudla ngoba asikhoni ukuzilimela siphila emashop. So lento mpela kungathi iletha ukwesaba okukhulu. Mina njengami sengisesaba. Njalo ngixwayisa lapha ukuthi qaphelani bantu umkhuhlane ungenile, sizaphela ngokudla, okukhiqizwayo emashop. Sizathemba bani ngoba sithembele kulawa amashop kanti yiwo asibulalayo futhi.”

Kusenjalo, iZimbabwe isiyethule umqoqo ovimvela ukuthengwa kwenhlobo yalezi inyama kweleSouth Africa ngenjongo yokwenqabela ukungena kwalo umkhuhlane elizweni. Kodwake isizalwane seZimbabwe kweleSouth Africa umnumnzana Sifiso Khulumani ukhuthaza uhulumende ukuthi enze okuphezu kwalokho.

“Uhlangothi lwezempilakahle olwe Health Department sicela ukuthi igqugquzele ngokusemandleni ukusiza umphakathi ukuze bephephe kule inkinga. Emalokitshini, amatownship, emasuburb abantu bazi ngokushesha ngoba impilo is very important. We live life once please siyacela hulumende.

Okwamanje uhulumende wakweleSouth Africa uselaye ukuthi imihlobo yonke yalezi inyama ibuyiselwe ezitolo, lazo ziyibuyisele lapho eyenziwa kona ukuze itshiswe ilahlwe.

Ingciwane elibangela lo umkhuhlane litholakala kakhulu kwezemvelo ezibalisa umhlabathi, amanzi, izihlahla, inyama lokunye esikuthola ezinyamazaneni, ezithelweni kanye lemibhideni. Okwamanje kweleSouth Africa usubulele abantu abaphoze bafike amakhulu amabili (180) wahlasela abaphose bafike inkulungwane eyodwa.

Facebook Forum

XS
SM
MD
LG