amalinks wokungena

Breaking News

Abadabuka eZimbabwe Abahlala eGoli Bavula Indawo Yokugcina Ingwalo eNtulula Primary School


Sokulama computers esikolo seNtulula Primary School

AbeZimbabwe abahlala eGoli sebesungule ilibrary leComputer lab esikolo seNtulula Primary eTsholotsho.

Baveza elomhlathi abafundi lezakhamizi zeNtulula ngemva kwalesi sipho esibatshiye bengelankani.

Abantwana esikolo seNtulula Primary School
Abantwana esikolo seNtulula Primary School

Les'isipho senqwaba yezingwalo, amacomputer, umabona kade leDVD player, sivele kunhlanganiso yeSibanesethu Community Learning Group, esungulwe nguNkosikazi Sibhekaphi Sibanda lomkakhe uMNu. Wonder Ncube abasebenza kweleSouth Africa.

UNkosazana Sibanda, owafunda kules’isikolo uthi labomalayitsha balindawo labo bafake isandla ngokuthwala lezi impahla zisuka kwele South Africa kungelambadalo.

“Sikubone kufanele ukuthi silethe izinsiza lapha esikolweni ezizancedisa amatitsha uthi ukufundisa kwabo kube lula. Indawo yakithi ilama low literacy levels. So, sikubone kufanele ukuthi silethe lokhu esikulethileyo ukwenzela ukuthi sipromothe iliteracy.”

UMaSibanda uthi ukusweleka kwezinto ezikhuthaza abantwana ukuthi bafunde kule indawo sekubangele ukuthi abanengi bengaqedi isikolo kanti abanye babalekela kweleSouth Africa lapho abacina sebesiba yizigebenga njengoba bayabe bengafundanga.

Lezi zipho sezitshiye abantwana bakulesi sikolo bejabule kakhulu kwazise inengi labo kuzakuba ngokokuqala ukusebenzisa icomputer. Omunye wabathabe kakhulu nguPetronella Ndlovu ofunda uGrade 6.

“Esikolo sethu ngibone ilibrary elamabhuku amanengi lapha esizabe sifundela khona ezinye izinto esingazaziyo. Ngayabona leroom elilamacomputer lapho esizabe sifunda khona ngamacomputer. Ngize ngabona lenduna ekade ngingakaze ngiyibone. So siyababonga abantu beSibanesethu. Basincedile ukwenzela ukuthi sibe lekusasa elihle esikolo.”

Usobhuku wale indawo, uMnu. Zenzo Vundla, laye uthi uswele imilomo eyinkulungwane yokubonga.

Basendaweni entsha yokugcina ingwalo esikolo seNtulula Primary School eTsholotsho.
Basendaweni entsha yokugcina ingwalo esikolo seNtulula Primary School eTsholotsho.

“Besingacabangelanga ukuthi eNtulula kungavela into enje. Izigaba zonke kusukela koMasuza, Gcwala, ngaphi, Gariya, Zibalonkwe, siyalibonga kakhulu engathi inkosi ingaba lani ukuze lakusasa siyetholakala siphumile komnyama ubambile.”

Kantike uNkosikazi Ncube ofundisa kulesi sikolo uthi lezi ingwalo lala macomputer azaguqula impilo ezinengi kulesi sikolo.

“Sesilayo icomputer. Abantwana bazayisebenzisa, bazayibamba, bayitsho, balifakaze ivangeli phandle ukuthi thina esikolo sethu sokunje siphucukile. Siyabonga kakhulu thank you so much.”

UNkosikazi Bhekaphi Sibanda uthi lesi yisipho esizakhanyisela izigaba zonke zakulindawo.

“Konke lokhu icommunity yethu izakuba le access. Izakwanisa ukuthi ibuye abantu bazobala. Labantu abasesocondary abantwana bayabuya bazobala. Labazali babuye bezobala. Kulabomama esithi ngamaliteracy champions. Zonke izinhlelo esizazenza lapho esikolo kutsho ukuthi bona yibo abazazisustainer kucommunity.”

Ukhuthaza ezinye izizalwane zeZimbabwe ezisemazweni ukuthi lazo zenze okufanayo ezikolo ezafunda kuzo.

Udaba Esilethulelwe NguBenedict Nhlapho
please wait

No media source currently available

0:00 0:03:51 0:00


Facebook Forum

XS
SM
MD
LG