amalinks wokungena

Zimelele Uncedo Izakhamizi Zako Sipepa Ezabalekela Izulu Lesikhukhula


Omunye walabo ababalekela izulu lesikhukhula.

lzakhamizi ezihlala koSipepa eTsholotsho esabelweni seMatabeleland North zithi uhulumende sokumele aphume lendlela ngokuphangisa zokuhlenga abantu abehlelwe ludubo lwezulu lesikhukhula.

Izakhamizi ezikhulume leVOA Studio 7 zithe zikhangelelwe ukuthi zizatholelwe ndawo ezigcono zokwakha imizi emitsha.

Omunye wazo, uMnu. Innocent Sibanda, oleminyaka engamatshumi amane lasikhombisa oyisakhamuzi seMaphili eyinye yezindawo ezinhlanu zako Sipepa ezihlaselwe zimpopoma zamanzi kumaviki amabili adluleyo, uthe ulahlekelwe yimpahla yakhe yonke.

USibanda uthe kufe izifuyo zakhe ezinengi njalo kwatshabalala lamabele emasimini akade sevuthiwe.

USibanda ngomunye wabantu asebehlala eSipepa Flood Victim Camp eSipepa Rural Health Centre ngemva kwesahlakalo sempopoma zamanzi ababhekane laso.

UMnunzana Andrew Gabela, umphathisikolo sakoSipepa Primary School njalo ongumgcinisihlalo wekhomithi yeSipepa Flood Victim Camp, uthe endaweni yakhe balabantu abafika amakhulu ayisificaminwe mbili ababesesaba ukugalula.

Uthe abantu laba sebaphiwa amatende yinhlanganiso yeRed Cross njalo yiyo epha abantu ukudla.

Uzulu owabalekele izulu lesikhukhula usenikwa lamanzi lokunye okutshiyeneyo.
Uzulu owabalekele izulu lesikhukhula usenikwa lamanzi lokunye okutshiyeneyo.

Amanye amatende avela kunhlanganiso yomhlaba iUNICEF.

Phakathi kwabantu abangamakhulu ayisifica minwe mbili abahlala eSipepa Flood Victims Camp, kulabantwana besikolo njalo abakuzifundo eziphansi abedlula amakhulu amathathu lamatshumi ayisikhombisa, kuthi abasezikolo eziphezulu bangamatshumi amathathu.

Noma ejabula ngosizo olutholiswa abantu laba, uGabela uthe badinga kakhulu usizo lokudla okunjengendumba lamatemba.

Uthe badinga losizo lwengubo, impahla zokugqoka lemvunulo yabomama lapho sebengene esikhathini.

UGogo uLucy Tshuma, oleminyaka engamatshumi ayisithupha osuka eMahlaba, uthe ngesikhathi kusiza impopoma zamanzi alezikhukhula wayesekubonile ukufa kodwa ubonga uMlimu ngoba bathwalwa ngamahelicopter basiwa endaweni eziphezulu.

Uthe kasaboni kufanele ukuba baqhubeke behleli emizini yabo kodwa badingelwe indawo eziphezulu ngoba wakhe duze lomfula uGwayi njalo bahlala bebhekane lodubo lwezikhukhula zamanzi.

UMaTshuma uthe ubonga uMlimu ngamandla awapha abantu abenelisa ukubahlenga ngesikhatshana sokune izulu elilesikhukhula.

Uthe ngabe uNkulunkulu uyangenela akhulumisane lohulumende abatholele njalo indawo eziphezulu zokuhlala.

Ekhuluma ngemva kokwethekelela iSipepa Flood Victims Camp NgoMvulo, uMqondisi weZimbabwe Red Cross Society uMnunzana Edison Mlambo, uthe inhlanganiso yakhe izaqhubeka incedisa bonke abawelwe yingozi yezulu lesikhukhula.

Indawo yeTsholotsho ngeyinye yeziqinti zelizwe ehlala ibhekane lodubo lwezikhukhula lempopoma zamanzi. Ngomnyaka ka2014 yabhekana lodubo olufanayo.

Facebook Forum

XS
SM
MD
LG