UMnu. Job Sikhala, umsekeli womgcinisihlalo webandla leMovement for Democratic Change (MDC) elikhokhelwa nguMnu. Nelson Chamisa ubotshiwe ngoLwesibili kulandela inkulumo yakhe yokuthi ibandla lakhe lizagenqula uhulumende kaMongameli Emmerson Mnangagwa kungakafiki ukhetho ngomnyaka ka2023.
USikhala ubizwe ngamapholisa eHarare Central Police lapho ahambe khona ephelekezelwa ligqwetha lakhe uMnu. Obey Shava.
Amapholisa amethese icala lokuzama ukugenqula uhulumende owakhethwa nguzulu ngendlela engekho emthethweni. Nxa engatholakala elecala, uSikhala ulakho ukuvalelwa entilongweni okweminyaka engamatshumi amabili.
UShava uthi ukhathazekile yikuphuza ukulungisisa amaphepha okusa uSikhala emthethwandaba okwenziwe ngamapholisa okwenze engasathonisiswa ngoLwesibili.
“Ngilaye lapha sise Law and Order eHarare Central Police Station. Wetheswa icala lokuzama ukugenqula uhulumende okungekho emthethweni. Sesiphendulile lokho akwetheswayo sikwala. Sesilungiselele ukuya emathethwandaba kusukela ekuseni silungiselela impumela ezitshiyeneyo. Kunje simelele amapholisa ukuthi alungiselele.”
Ibandla leMNDC lithi lisekela uSikhala. Lokhu kuza ngemva kokuba ibandla le MDC lizisuse kulokho uSikhala akukhulumayo. USikhala ukhangelelwe ukumiswa phambi komthethwandaba ngoLwesithathu.
Umsekeli wesikhulumeli sebandla leMDC, uMnu. Luke Tamborinyoka, wethule umbiko othi uSikhala akukhulumayo akusiwo umbono weMDC, kodwa wakukhuluma ezimele.
Lokhu kuza ngemva kokuba amazwi kaSikhala eyamukelwe ngemibono etshiyeneyo uhulumende esithi atshotshozela udlakela elizweni.
Kodwa isikhulumeli sebandla leMDC, uMnu. Daniel Molokeli, uthi bazakuma loSikhala lapho ethoniswa.
“Thina silaye umhlonitshwa uvice chairman wethu siyabe silaye. Icala lakhe leli nxa lingena kusasa so asimlahlanga njengokutshiwo ngabanye abantu. Thina ngokubona kwethu akala cala kodwa ngokwama dale ukuthi akhulume thina njenge MDC siyamsekela.”
Kodwa abanye baveze ukukhathazeka ngamazwi kaSikhala besithi utshotshozela udlakela elizweni.
Omunye wabachothoza okwenziwe nguSikhala nguMnu. Dexter Nduna, omelet iChegutu West kudale lephalamende ekubandla leZanu PF, othi uSikhala usejayele ukukhuluma lokhu.
“Nxa sisizwa imbiko enje akulunganga, uyabona unobhala wogatsha lokuhanjiswa kwembiko uSimon Khaya Moyo owe ZANU PF ufakile umbiko otshengisa ukuthi inkulumo enje ayilunganga. Khona vele nxa kukhangelwe inkulumo yakhe loba ephalamende uyakhuluma imihlolo sibili, indaba ezingela nhlonipho kodwa uyabe esithi ephalamende uvikelwa ngumthetho we Immunity, kodwa nxa sekuphandle ngale hayi lapha usetshotshozela udlakela. Yinto engalunganga, yinto esithi phansi layo nxa sikhuluma ngimele iChegutu constituency,”
Ingcwethi kwezombusazwe, uMnu. Charles Nyoni, uthi uhulumende uyakwazi ukuthi uzulu uyafuthelwa yibunzima obuselizweni ngakho ukubopha akwenze uSikhala yindlela yokuzama ukuncindezela kanye lokwethusela wonke umuntu ongaba lomcabango wokuchothoza uMnangagwa.
“Icala eletheswa uHonorable Sikhala lokuthi uzama ukugenqula uhulumende kutshengisa okusegcekeni ukuthi uhulumende akakantshintshi njalo uzimisele ukuba elokhu encindezela uzulu ngoba uJob Sikhala into ayikhulumayo yinto esasivele siyikhuluma ukuthi uMugabe kahambe. UTsvangirai laye waze wakhuluma lokho ukuthi uzasusa uMugabe loba ngayiphi indlela. So, osokumangalisa ngendaba kaSikhala kuyini? Kodwa nje nguhulumende ofuna ukusebenzisa indlela zokuthi ancindezele uzulu njalo nje ukuthi afake ukwesaba kuzulu ukuthi labo bangacabangi ukumsusa ngoba uyazi abantu sebekhathele ngaye.”
Ukubotshwa kuka Sikhala kulandelwe yimbiko yosekelo enkundleni zokuxhumana lokuzilibazisa ezebulenjini ezigoqela iTweeter, Facebook lezinye, ivela enhlanganisweni ezilwela amalungelo oluntu ezigoqela iZimbabwe Lawyers for Human Rights zona ezisole ukubotshwa kwakhe.
USikhala ukhangelelwe ukumiswa phambi komthethwandaba ngoLwesithathu.
