amalinks wokungena

Breaking News

31st July Movement: Sizaqhubekela Phambili Ngokutshengisela Emigwaqweni Loba Sisethuselwa Nguhulumende


FILE: Okwake kwenzakala ngomnyaka ka2016 abantu betshengisela emigwaqweni eHarare. (AP Photo/Tsvangirayi Mukwazhi)
FILE: Okwake kwenzakala ngomnyaka ka2016 abantu betshengisela emigwaqweni eHarare. (AP Photo/Tsvangirayi Mukwazhi)

Abenhlanganiso zikazulu abakumkhankaso wokuqoqa ukutshengisela ekupheleni kukaNtulikazi, owe31st July Movement bathi kuzoqhubekela phambili ngalokhu lobanje besethuselwa nguhulumende ofuna ukuqinisa iziqondiso zohlelo lokuvalela abantu ezindlini olweLockdown esithi umemetheka kakhulu okwamanje umkhuhlane weCOVID-19.

Linkulumo yabomkhankaso we31st JULY MOVEMENT yethulwa ngesikhathi uMongameli Emmerson Mnangagwa esanda kubika ukuthi uhulumende ulakho ukuqinisa iziqondiso zohlelo lolu njengoba bebanengi okwamanje abantu abatholakala belomkhuhlane weCOVID-19.

Okhokhela umkhankaso lo, uMnu. Jacob Ngarivhume, owebandla leTransform Zimbabwe, uthi kababuyeli emuva ngenxa yokuthi abantu bathwele nzima eZimbabwe.

“Sesiwazisile amapholisa njengalokho okutshiwo ngumthetho weMOPA. Umthetho uthi kumele sazise amapholisa. Sesikwenzile lokho. Siyazi mhlophe ukuba ikhona phakathi kwethu leyo COVID. Siyakuzwisisa ukuba iCOVID sekungumkhuhlane oyingozi enkulu. Ngokufanayo sithi thina inkohlakalo ifana nje lomkhuhlane oyingozi. Kodwa imizamo yethu yokubana senze konke okusemandleni ethu, ukulwisana lodubo lwegciwane leCOVID njengelizwe, sekubuyiselwe muva kakhulu kubangelwa yimisebenzi yenkohlakalo.

“Inkohlakalo isiyenze sehluleka khona ukulwisana laloludubo lweCOVID. Kunje silodaba lwenkohlakalo olulokhe lungakagqitshwa oluphathelane lezokutholisa uhulumende usizo lwempahla yokulwisana laleligciwane leCOVID-19.”

Omunye wabaphatheke emkhankasweni wokukhuthaza uzulu ukuphatheka kulokhu kutshengisela, uMnu. Charles Nyoni uthi kabethuswa ngokukhulunywa nguhulumende.

“Umzamo kahulumende njalo loweZanu PF owokufuna ukusethusela ukuthi singangeni emgwaqweni mhlaka 31 awungeke usivimbe thina njengozulu ekutshengiseleni njalo singena emgwaqweni sitshengisela ukuthi hayi sokwanele, sesikhathele, kasisafuni njalo kasisayesabi.

“Uhulumende okhokhelwa yiZanu PF ulecorruption enkulu, inkalakatha engakhulumekiyo njalo izinto ezenzakalayo ezimbalwa abantu bengabotshwa zitshengisa ukuthi uhulumende kaMnangagwa kazimiselanga ukuqeda udaba lwecorruption kanye laye nje vele ucorrupt.”

Kodwa umqondisi wohlangothi lwezokusabalaliswa kwemibiko kuZanu PF, uMnu. Tafadzwa Mugwadi, uthi uhulumende kaMnangagwa lebandla leli bazimisele ukuziqeda izehlakalo zenkohlakalo esezibhahe elizweni.

“Yikho nje sesibone oDouglas Tapfuma besezintolongweni sikhuluma kunje. Yikho oJorum Gumbo belendaba zabo ezisemthethwandaba. Yikho nje oPriscah Mufumira belendaba ezisemithethwandaba. Yikho nje oUndenge sebavalelwa. Konke lokhu kuyisibonelo sokuba uhulumende uzimisele ukulwisana lemisebenzi yenkohlakalo. Sikhuluma kanje, uDr. Obadiah Moyo obengumphathintambo wogatsha lwezempilakahle sewasuswa esikhundleni sakhe sokuba ngumphathintambo wezempilakahle. Watshelwa ukuba angake aqhubeka kuCabinet kaMnangagwa.”

AbeZanu PF bathi abasoke bagoqe izandla babukele nje abomkhankaso lo betshengisela ilizwe libhekane lodubo lokusabalala kwegciwane leCOVID-19

Lokhu kwethulwe ngosaphethe isikhundla sesikhulumeli sebandla leZanu PF, uMnu. Patrick Chinamasa, kanye lomsekeli womphathintambo wezomvikela lokulondolozwa kwabalwa impi yenkululeko, uMnu. Victor Matemadanda, abakubeke sobala ukuba bazojeziswa bonke abazatholakala bephatheka kulokhu kutshengisela.

Kodwa abe 31st July Movement bathi uzulu wonke kunhlangothi ezehlukeneyo usekhathele ngokwenzakala eZimbabwe.

Udaba Esilethulwe NguMavis Gama
please wait

No media source currently available

0:00 0:04:07 0:00


XS
SM
MD
LG