UMnu. Herman Mashaba, osanda kubumba ibandla lakhe lezombangazwe kwele South Africa elibizwa ngokuthi yiAction SA, uthi sokumele kubanjwe imali lempahla etshiyeneyo yonke eselizweni leli yeziphathamandla zebandla leZanu PF ukwenzela ukuthi ibandla elibusayo eZimbabwe lihloniphe amalungelo abantu.
UMashaba, owayekubandla leDemocratic Alliance, utshele umsakazo we-ENCA ukuthi uhulumende kaMongameli Emmerson Mnangagwa ukhahlameza uzulu.
Uthi sokuzalele ingwe eZimbabwe ngoba abaphikisayo babotshwa bahlayana kuthi njalo abanye sebebalekela kwamanye amazwe.
Asenelisanga ukukhuluma ngolokhu leziphathamandla zikahulumende wakwele Zimbabwe.
Okwethulwa nguMashaba kwachazwa encwadini ejulileyo eyalotshwa ngabafundisi beRoma abasekelwa ngabanengi abokholo lweSiKhristu, inhlanganiso ezizimeleyo, amanye amalunga ebandla leAfrican National Congress kanye lawe Economic Freedom Fighters.
Kodwa uhulumende wakwele Zimbabwe uthi abantu ababotshwayo ngabatshotshozela udlakela elizweni abafuna ukugenqula uhulumende kaMnangagwa.