amalinks wokungena

Breaking News

Sesiqalisile Ukuhamba Isitimela Esisuka eFrancistown Sisiya koBulawayo


Isisebenzi sigezisa phakathi kwesitimela.

Isitimela esihamba phakathi kwedolobho lako Bulawayo leFrancistown sisungule uhambo lamuhla, osekuthokozise izihambi, ngesikhathi zilungiselela ukuphindela ekhaya ngekhefu leKhisimusi.

Isitimela sezihambi sisuke edolobheni leFrancistown ngehola lesikhombisa lamhla ekuseni, silubhekise koBulawayo.

Isikhulumi sikaloliwe weBotswana Railways (BVR), uMnu. Kebabonye Moreowagae, utshele iStudio 7 ukuthi isitimela lesi silamatolokisi ayaziwa ngokuthi yi-standard kuphela, njalo siyabe sisuka eFrancistown sisiya edolobheni lako Bulawayo nsukuzonke.

Amatolokisi la amatsha asanda kuthengwa kwele Melika emavikini.

UMoreowagae uthe isitimela sizaphakama eFrancistown ngehola lesikhombisa ekuseni nsuku zonke, sikhangelelwe ukuthi sizafika koBulawayo ngehola letshumi lambili emini.

Sizahamba sisima endaweni ezifana lePlumtree le Figtree.

Sizabuyela edolobheni leFrancistown sisuka koBulawayo ngehola lesithathu, siyefika kwele Botswana ngehola lesitshiyagalo mbili ntambama.

Okuthabise inengi yikuthi ukuhamba ngesitimela kulula ngoba kabasozwe bafole kundwendwe eziba khona emngceleni wePlumtree leRamokgwebana.

UMnu. Andreas Sibanda wamukele kakhulu isitimela lesi.

“Ukuphenduka kwesitimela siyakuthakazelela ikakhulu ngalesi sikhathi kulesiphithi phithi emngceleni. Uma uhamba ngesitimela akula kwehla emngceleni, konke kusenziwa phakathi.”

UNkosikazi Emily Tshuma laye uthe nomanje besamukela isitimela, bekungabangcono uma kungafakwa amatolokisi empahla ngoba inengi leZimbabwe livame ukuthwala impahla enengi.

“Kuyinto enhle ukufaka isitimela ngoba ungena uhlale uze uyewela ekhaya, ebesikucela yikuthi bafake amatolokisi emphahla.”

Isitimela salamuhla besithwele iziphathamandla zenkampani yeNational Railways of Zimbabwe leye Botswana Railways.

Ukusungulwa kohambo lwesitimela kuzanceda kakhulu abantu beZimbabwe abathenga impahla kwele Botswana, besiyathengisa ekhaya.

Kukhangelelwe ukuthi ukungena kwesitimela kwehlise inani elisebenzisa umngcele wePlumtree leRamokgwebana wona ominyana okwamagama ikakhulu ngamakhefu afana lawe Khisimusi.

Facebook Forum

XS
SM
MD
LG