amalinks wokungena

Breaking News

Kuchothozwa Abadabuka eZimbabwe Abaphatheke Kusenzo Sika Mfundisi Lukau 'Sokuvusa Ofileyo'


Bayakhala ngokwenziwe ngabadabuka eZimbabwe abancedisane loMfundisi Lukau "ekuvuseni" umuntu ofileyo.
Bayakhala ngokwenziwe ngabadabuka eZimbabwe abancedisane loMfundisi Lukau "ekuvuseni" umuntu ofileyo.

Abantu abadabuka kwele Zimbabwe abahlala eSouth Africa sebesole abanye babo abaphatheke kusenzo sobuqili sikaMfundisi Alph Lukau, oweDemocratic Republic of Congo owebandla leAllelluah Ministries, owenze kwabonakala sengathi uvuse umuntu kwabafileyo.

Lesi senzo sesithukuthelise kakhulu abadabuka kwele South Africa lohulumende.

Lesisenzo sobuqili ngenjongo yokuzidingela abakhonzi sesisolwe ngabanengi ngemva kokuvela kokuthi lo okuthiwa ubefile, akulabufakazi bamapholisa lesibhedlela ukuthi ubefile kanti njalo lenkampani yokungcwaba okuthiwa yiyo ebesiyaqhuba umngcwabo wakhe isithi kayizange ibe lesidumbu salowo muntu.

Ukuvela kwemibiko yokuthi abafakaza imfa yalowo muntu ngabeZimbabwe lokuthi lowo muntu laye kuthiwa ngowe Zimbabwe, sekutshiye inengi labantu abadabuka eZimbabwe bezonde okumangalisayo.

Isizalwane seZimbabwe, uMnu. Mthabisi Mlingo, uthi basele bengelankani.

“Kuyadanisa futhi kuyayangisa ukutholakala kwabantu bakithi bethinteka phakathi kwehlazo elingaka elethuse umhlaba wonke ukuthi umuntu uyavuswa esefile.”

Leyinto egcizelelwa ngomunye wesifazana weZimbabwe ongathandanga ukuvezwa igama.

“Kusithelela inhloni thina abantu beZimbabwe ukuthi siphatheke ezintweni ezinjengazonalezi. Singabe sihluphekile sifuna imali kodwa ngibona kuyinto engaphandle.”

Umphathintambo wogatsha lwezomdabu kwele South Africa usekhuthaze ikomishini ebona ngezenkolo ukuthi ivikele umphakathi kubafundisi abafana loLukau.

Umgcinisihlalo wale ikomishini uNkosikazi Thoko Mkhwanazi-Xaluva, uthi bahlela ukuyabophisa uMfundisi Lukau.

“Bekufanele ukuthi uMfundisi Lukau abe esemiswe umsebenzi … Sekuhlolisiswa ngales’isenzo sobunyamazana asenzele sona.”

Kusenjalo, uAdvocate Mafu, iqwetha elimela inkampani yomngcwabo iKings and Queens okuyiyo elemota okuthiwa ibithwele isidumbu salo okuthiwa uvukile, uthi bahlela ukuvula icala ngoba imota yabo isetshenziswe ngokungekho emthethweni njengoba bengazi lutho ngalo omuntu okuthiwa yibo abebephiwe umsebenzi wokumlungiselela ukuthi ayengcwatshwa.

“Umtshayeli wethu usuke kithi engelabhokisi, engelasidumbu kodwa elemota yethu kuphela. Sengithole umlayo wokuthi sethese laba bantu icala lokungcolisa igama lethu.”

Indaba zabafundisi abenza okubi besebenzisa ibhayibhili kweleSouth Africa ziyanda kugoqela ababamba iganyavu, abadlisa abantu inyoka loba utshani.

XS
SM
MD
LG