amalinks wokungena

Abantu Kwezinye Indawo ZakoMadlamdudzi Bakhala Ngokuswelakala Kwamanzi


Izakhamizi zihluthswa yikusilela kwamanzi koMadlambudzi.

Abantu abahlala eBhangale leGonde koMandlambudzi labosomabhizimusi balindawo bakhala ngokuthi babhekane lodubo lwamanzi osokubabamba ngamandla ukunatha lezifuyo edamu leMadlambuzi elilamanzi angahlanzekanga.

Amanzi yimpilo, inengi labantu liphila nzima ngenxa yokusilela kwamanzi hatshi koMdlambuzi kuphela kodwa ngasemhlubulweni weMandebeleni osekutshiye inengi labantu linatha amanzi angahlanzekanga.
Imifula lemithombo sekwawoma uzulu usehamba umango umude esiya kukha edamu leMadlambuzi, lasezitolo zakhona osomabhizimusi baphila nzima.

UNkosikazi Seli Sibanda, uthe banatha amanzi edamu, angcolile abalamigodi ngakhoke bacela ukugejelwa imigodi njalo sebeleminyaka eminengi benatha edamu.

Osakhulayo uCleopatra Moyo uthe udubo lwamanzi eMadlambuzi lunzima njalo imithombo iyacima bacela ukugejelwa izibholane.

UMnu. Tengani Chaguma Sibanda uthe basuka eBhangale bahamba amakhilomitha ayisikhombisa bezokukha amanzi.

Esinye isakhamuzi seBhangale uMnu. Rabson Moyo, uthi ngeviki bakha amanzi kabili edamu leMadlambuzi.

UMnu. Kintu Ncube, uthi olengqola yinkosi ngoba uthwalela imuli ezinengi amanzi ngenxa yokuba bawathola kude, ingqola ingafa baphilanzima.

UNkosikazi Evelyn Dube uthe yena useMasendu duze lomfula kodwa abantu abahlala eGonde yibo ababhekane lobunzima.

Iziqinti ezinengi zemhlubulweni weMaNdebeleni zibhekane lodubo lokuthola amanzi ahlanzekileyo okunatha, inengi labantu linatha emachibini lezifuyo, imigodi eminengi seyafa ngenxa yokonakala komnotho elizweni, abantu abesenelisi ukuzilungisela imigodi, lohulumende kenelisi ukugebhela abantu izibholani.

Facebook Forum

XS
SM
MD
LG