amalinks wokungena

Malusi Gigaba: Yekelani Ukuhlasela Abantu Bokuza eSouth Africa

  • Bennedict Nhlapho

Abantu bokuza bahlaselwa yizizalwane zeSouth Africa kwezinye indawo zelizwe.

Umphathintambo wogatsha lwendaba zasekhaya kweleSouth Africa, uMnumnzana Malusi Gigaba, usekhuthaze izizalwane zakulelo lizwe ukuthi zekele ukuhlasela abakwamanye amazwe.

UGigaba ukhulume lokhu emhlanganweni wabezindaba ngoLwesine kulandela ukuhlaselwa kwabakwamanye amazwe eJohannesburg lase Pretoria.

Uthe izizalwane zeSouth Africa kumele zibikele amapholisa nxa kukhona okubi okwenziwa ngabantu bokuza.

Izehlakalo zokuhlaselwa kwabakwamanye amazwe kweleSouth Africa sezethuse abanengi kuzwekazi le Africa osekubambe ngamandla uhulumende ukuthi aphumele obala esola ukuhlasela lokhu.

Ekhuluma emhlanganweni wabezindaba eCape Town, uGigaba ukubeke kwacaca ukuthi uhulumende akasekeli ngitsho lakancane ukuhlaselwa kwabantu bakwamanye amazwe kungakhathalekile ukuthi benzeni.

Uthe abomthetho yibo kuphela abalemvumo yokujezisa labo abadala amacala.

“Akulanto ebambekayo engatholakala ngokuhlasela abakwamanye amazwe. Labo abenza njalo behlisa isithunzi sethu. Into yakuqala esilawulayo yikuthi singabantu sonke kungakhathalekile ukuthi umuntu uvela kuliphi ilizwe kumbe lokuthi ulezincwadi ezisemthethweni loba hatshi.”

UGigaba ukhuthaze amapholisa ukuthi aqaphe ngeso elibukhali endaweni lezi ezilodlakela, kubotshwe bonke abadala amacala kungakhathalekile ukuthi ngabakweleSouth Africa kumbe ngabakwamanye amazwe.

“Ngikhuthaza amapholisa ukuthi ayengobunengi endaweni eziqhamuka lolu udlakela. Ukwehluleka ukwenza lokhu kutshengisa ukwehluleka okuphindiweyo ngoba kungamemethekisa loludlakela. Sifuna wonke umuntu alandele umthetho ogoqela lokubuyisela emuva labo abaselizweni ngokungekho emthethweni.”

UGigaba uthi usehlele umhlangano labameli bamazwe enhlanganisweni ye African Union ukuze akubeke obala kubo ukuthi uhulumende usethatha amanyathelo okuqeda ukuhlasela lokhu. Lokhu kulandela umbiko owethulwe nguhulumende we Nigeria ekhuthaza i-AU ukuthi ingenele kuloludaba.

Ukuhlasela lokhu kuqondiswe kakhulu kuzizalwane zakweleNigeria ezetheswa umlandu yizizalwane zakwele South Africa wokuthengisa izidakamizwa lokuqhuba inhlelo zokuthengiswa kwezocansi.

Ekuhlaseleni lokhu okwenzeke emalokitshini eRosettenville eJohannesburg, lase Atridgeville ePretoria sekutshiswe izindlu ezedlula itshumi lanhlanu, izimota kanye kanye lokugqekezwa kwezitolo zabakwamanye amazwe.

Umgcinisihlalo wenhlanganiso yeZimbabwe Community in South Africa umnumnzana Ngqabutho Mabhena uthi bemukela ngezandla zombili inyathelo likahulumende lokuphumela obala ekhuza ukuhlasela lokhu.

“Ukhulumile ukuthi bona njengohulumende bazimisele ukuthi ubudlwangudlwangu lobu babuqede. Bahlangene lalaba abeMamelodi bakhulumisana labo ukuthi lento abayenzayo akumelanga kube lomsindo phakathi kumbe kutshaywe abantu kugcize kusiba lezidumbu.”

Kodwa-ke uMabhena uthi bakhathazeke kakhulu ngokuvunyelwa kokutshengisela kwangolweSihlanu okuqoqwe yilabo abafuna abakwamanye amazwe baphume baphele elizweni.

Lokhu kutshengisela kuqoqwe yizakhamizi ze Mamelodi ePretoria.

“Kuyasihlupha ukuthi ukutshengisela kwakusasa lokhe kusiya phambili. Abantu bethukile kakhulu ngoba asikwazi ukuthi kuyini okuzakwenzakala. Thina-ke esikucelayo sibiza zonke inhlangano zombusazwe ezilapha eSouth Africa, icivil society ukuthi sihlangane sikhulume lezakhamuzi kuma communities ukwenzela ukuthi siqede lento okuthiwa yixenophobia.”

Kusenjalo izizalwane zakwamanye amazwe ezihlala elokitshini leMamelodi, eSoshanguve, lamanye aseduzane kugoqela lezeZimbabwe sezibalekile kula amalokitshi ngokwesabela ukuthi zingahlaselwa ngesikhathi sokutshengisela kwakusasa.

Kodwa-ke uGigaba uthi usekhulume lazo izakhamizi lezi ukuthi kungabi lodlakela ekutshengiseleni lokhu wabuya njalo wakhuthaza amapholisa ukuthi aphume ngobunengi esiyaqapha isimo.

Facebook Forum

XS
SM
MD
LG