Abammeli bedale lephalamende abakubandla leZanu PF sebethethe isinqumo sokuthi bengathengelwa izimota ezidulayo besithi kumele ilizwe leZimbabwe lilondoloze imali yokwenza inhlelo zikazulu.
Abameli bedale lephalamende abakumanyano weMDC Alliance bona bathi izimota bayazifuna ngoba zenza umsebenzi wabo ubelula.
UMnu. Pupurai Togarepi, oyindunankulu yebandla elibusayo leZanu PF edale lephalamende, wethule umbiko wokulondoloza imali esithi isinqumo sabo lesi sivelele enhliziyweni zabo ezibuthakathaka ngoba babone ukuthi isikhwama selizwe kasilamali eyenelayo yokubhadala odokotela lezinye izisebenzi zikahulumende.
UNkosazana Princess Nkomo, oyisakhamuzi seGlenview, uncome kakhulu lesisenzo esithi sitshengisa ukuzimisela kwebandla leZanu PF ukulungisisa umnotho welizwe osubhidlika.
“Lesi yisenzo esihle kakhulu ebesisikhangelele ebantwini esabakhetha ukuthi basimele njengozulu. Ilizwe lethu limi manzonzo akulamali, ifuel ayikho okutsho ukuthi kufuze inkokheli ecabangayo ibone ukuthi iqakathekisa ukuphilakahle kukazulu hatshi okwezimota zabo.”
Omunye njalo ohlaziya ngenhlalakahle kazulu, uMnu. Iphithule Maposa, okubandla leZapu, uthe lobanje kunzima ukuthemba ibandla leZanuPF.
“Kunzima nje ukuthemba iZanu PF lobanje into ekhulunywe nguTogarepi kuyinto okufuze iyenziwe. Kakulula ukubakwazi ukuthi iZanu iqinise okunganani. Loba nje kuyinto engezeke ivuse umnotho welizwe kodwa kumele kwenziwe ngoba kunengi okufuze kwenziwe okugoqela ukukhupha iZanu esikhundleni. Kodwa nxa sebethethe lelonyathelo, kunganceda njelakho kancane.”
Kulabanye njalo abatshengise ukungajabuleli lesi sinqumo besithi ibandla leZanu PF laziwa ngokwenza izithembiso zamanga. Bathi ibandla leZanu PF lizama nje ukukhala lozulu ukuze kukhanye engathi lilabantu enhlizweni kodwa kungasiqiniso.
UMnu. Mlindelwa Mancitshana uthe abantu beZanu PF bavele kabalani lezimota ngoba bevele belazo ezinengi ezidulayo.
“Lokhu akusiyonto eliqiniso ngoba iZanu yathenga imota kudala ezezabelo. Nxa beqinisile ukuthi kabazifuni izimota kabazihambise ezibhedlela lenkambeni zamapholisa. Le yindlela nje yokulahlisa uzulu kodwa bona bavele belazo, bavuna kudala laba.”
UMnu. Tapiwa Ndlovu yena uchothoze kakhulu inkulumo kaMnu. Togarepi esithi yindlela nje yokususa uzulu endabeni ezimqoka zelizwe. Ubuye wathi kufuze baqakthekisa ukukhuluma lebandla eliphikisayo le MDC ukuze ilizwe liyephambili.
“Eqinisweni mfowethu konke lokhu akudingeki. Silapha nje yikuzigqaja kweZanu PF. Kuyikuthi iZanu ithanda abantu ngabe itshutshisa indaba yokuthi kukhulunywe lebandla leMDC sithole ukulungisisa ilizwe. Bengaze benzene kumbe bale ngitsho leholo labo, akusoze kusisize njengelizwe, kufuze sivule ilizwe lenelise ukwenza ibusiness. Kufuze silungisise indaba zokwebiwa kokhetho lezokukhipha ibondnote kueconomy yethu.”
