Abamabandla aphikisayo kanye lozulu basola inkulumo kaMongameli Emmerson Mnangagwa ayenze ekupheleni komhlangano weZanu PF Special Congress lapho atshelekhona abalandeli bebandla lakhe ukuthi bengazikhathi kangako kukhetho oluzayo ngoba amabandla aphikisayo sekuzingebhezi ezingatsho lutho.
UMnangagwa wethule lamazwi ngesikhathi egqiba umhlangano weCongress owenzelwe eHarare ngoLwesihlanu lapho akhethe khona eyinye yenkokheli ezokuba kudale elimqoka ele Politburo ebalisa omunye njalo umkhokheli webutho, uMajor General Engelbert Rugeje.
URugeje uphiwe isikhundla esimqoka esokukhokhela uhlangothi lokuqoqa inhlelo zebandla, ukhomisari.
Kodwa abebandla eliphikisayo ele MDC-T bathi linkulumo kaMnangagwa ayibamangalisi ngoba evele esaziwa njengesiqholo njalo ebona abamabandla aphikisayo njengezinja nxa kukhangelwa izilogan zakhe azenza emihlanganweni esithi bayakhonkota.
Unobhala jikelele webandla le MDC-T, uMnu. Douglas Mwonzora, uchaze uMnangagwa njengomuntu ongake akhethwa nguzulu nxa ukhetho lungahanjiswa ngendlela eyiyo kungela kuqilibezela.
UMwonzora ukhumbuze uMnangagwa ukuba akangakhohlwa ukuthi ibandla le Zanu PF lanqotshwe kwaba kabili kukhetho olwedluleyo kodwa kwasetshenziswa abezomvikela ukuvimba ukungena kwabo embusweni.
UNkosazana Sichasisile Ndlovu isiphathamandla senhlanganiso yeCommunity Youth Development Trust, elwela ilungelo labontanga edolobheni le Gwanda, esigabeni seMatebeleland South uthi akumelanga uzulu amangalisiswe yinkulumo kaMnangagwa ngoba evele elakho akuthembileyo.
UMaNdlovu uthi yikho ukwenza kwebandla leZanu PF kusukela ikhokhelwa ngosowasuswa esikhundleni, uMnu. Robert Mugabe.
Isikhulumeli sebandla eliphikisayo ele United African National Council (UANC) elikhokhelwa nguMnu. Nesbert Mutengedzanwa, engunobhala jikelele walo, uMnu. Alpheuos Mapuranga, uthi akavumelani lenkulumo kaMnangagwa yokuthi engasekho amabandla aphikisayo aqinileyo elizweni.
UMapuranga uthi le yinkulumo yomuntu owazi mhlophe ukuba usekelwa luhlangothi lwabakubutho.
Uzulu labamabandla aphikisayo bathi basola khona ukukhethwa kuka Major General Engelbert Rugeje, olisotsha ukuba nguye okhokhela uhlangothi olukhankasela libandla.
Abanye abakubutho abaphiwe izikhundla ezimqoka babalisa uMajor General Sibusiso Moyo, osengumphathintambo wezobudlelwano lamanye amazwe loAir Marshal Perence Shiri, owayengumkhokheli webutho lemoyeni owazakala ngokukhokhela ivuyo le Fifth Brigade.
Okhokhela ibutho, uGeneral Constantino Chiwenga, ucatshangelwa ngabanengi ukuthi engakhethwa ukuba ngomunye wabasekeli bakamongameli welizwe.