amalinks wokungena

Breaking News

Kambe uTsvangirai Nguye Owatshiya Ibandla Lakhe Limaqamuqamu Na?


Annahstacia Ndlovu

Abanye abantu babona engani ukubhubha kuka Mnu. Morgan Tsvangirai kwadalela ubunzima ibandla alikhokhela okweminyaka edlula itshumi lasikhombisa.

Bathi ibandla lakhe leMovement for Democratic Change (MDC-T) lahle langcwatshwa laye.

Bakubeka sobala ukuthi uTsvangirai wehluleka ukuhlalisana leyinye inkokheli yebandla leli okwenza ukuthi lidabuke phakathi abantu abanjengo Professor Welshman Ncube, uMnu. Tendai Biti labanye babumbe awabo amacele eMDC.

Okwamanje bathi yikho lokhu okwenza ukuthi ibandla leli libe lodlakela olumangalisayo osolutshiye abanye abalandeli balo betshaywa kwathophela.

Lokhu kwenzakala ngesikhathi ilizwe leZimbabwe lilungiselela ukhetho njalo abantu lokhe bebhalisa amagama abo kugwalo lokuvota olulungiswa yikhomishini yeZimbabwe Electoral Commission esebenzisa imitshina yeBiometric Voter Registration.

Langesikhathi esaphila uMongameli Tsvangirai bekusiba lobudlwangudlwangu kubandla leMDC okwenziwa ebantwini ababalisa uMnu. Welshman Ncube, uNkosikazi Priscilla Misiharaimgwi Mushonga, uNkosikazi Trudy Stevenson labanye kodwa khathesi sebehlasela umsekeli kamongameli uNkosazana Thokozani Khuphe.

Okhankasela ububa lilunga ledale lephalamende eBulawayo South, uMnunzna Josphat Mzaca, Ngulube ulandisa imbali yobudlwangudlwangu kuMDC-T.

Umkhokheli weMRP, uMnu. Mqondisi Moyo uthi uma ekhangela imbali yeMDC-T umuyi uTsvangirai ube engahlukananga lowayengumongameli welizwe uMnu. Robert Mugabe.

UMsekeli kaMongameli weMRP, uNkosazana Presia Ngulube uthi udwayi ufa lensiba zakhe nanku uTsvangirai usefe layo iMDC-T ngokungalandeli isisekelo sombuso.

Evumelana labanye uNkosazana Abigail Mupambi olwela amalungelo oluntu uthi abeMDC-T kumele bazibuthe ngoba ubudlova ababenzayo bulakho ukuphazamisa ukhetho esibhekane lalo.

ISikhulumeli seZAPU, uMnu. Iphithule Maphosa, uthi okwenzakala kuMDC-T yimpumela yobukhokheli bukamuyi obulakho ukuphazamisa hatshi umanyano weMDC Alliance kuphela kodwa izwe lonke jikelele.

Olwela amalungelo oluntu, uMnu. Mbuso Fuzwayo, uthi umuyi uzamile ukumela isizwe kodwa bekusiba lokuqhekeza kwemizamo yakhe.

Isakhamuzi sakoBulawayo, uMnu. Thamani Ncube, uthi uhlupho olukhona yikuthi eAfrica sakhela amabandla emuntwini nanko ibandla leMDC-T kungathi langcwatshwa lowayengumkhokheli walo.

Omunye wabalwa impi yeNkululeko phansi kwe-ZPRA, uMnu. Petros Sibanda, uthi okwenzakala kuMDC-T ayisikho abakuyela empini.

Ubudlwangudlwangu obuku MDC-T sebutshiye umhlaba ubambe owangaphansi lamanye amalunga aleli bandla eyangekile okwamagama ngoba inengi belikhangelele ukuba lizavusa ilizwe abantu baphume ebunzimeni bombuso weZanu PF.

Umlawuli wedale lePhalamende leZimbabwe uHon Jacob Mudenda lamhlanje emhlanganweni labesifazana abasuka kunhlanganiso ezehlukeneyo lamanye amalunga edale lephalamende uthe ngabe kuyenza bekuzakuba kuhle ukuthi umuyi uTsvangirai avuke abone okwenzakalayo kodwa isisekelo sombuso yiso esingammela ngoba ngeke asavuka.

Udaba Esilethulelwe NguAnnahstacia Ndlovu
please wait

No media source currently available

0:00 0:09:20 0:00

Facebook Forum

XS
SM
MD
LG