Abatsha abavela kumabandla atshiyeneyo bathi bazimisele ukuthi ukhetho lwelizwe leZimbabwe lonyaka luqhutshwe ngemfanelo.
Abasakhulayo laba abakumabandla agoqela eleZanu PF, MDC-T ekhokhelwa nguMnu. Nelson Chamisa lekhokhelwa nguNkosazana Thokozani Khupe, lamanye ambalwa sebebumbe ikhomithi abayibiza ngokuthi yiJoint Youth Liaison Committee.
Ikhomithi le ihlose ukuvimba indawo zonke zelizwe ukwenzela ukuthi kungabi lodlakela lonyaka ngesikhathi sokhetho.
Ukhetho lukhangelelwe ukuthi luzakwenziwa ngoNtulikazi kumbe ngoNcwabakazi.
Kodwa-ke okumangalise abatsha abavela kumabandla aphikisayo yikuthi abamele ibandla leZanu PF kabasenelisanga ukubuya emhlanganweni owenziwe ngoLwesithathu eHarare.
Lokhu kwethuse abanye abathi kusobala ukuba ibandla elibusayo kalisoze lekele ukwenza udlakela lonyaka ngoba abasakhulayo bakhuthazwa ngabantu abakhulileyo ukuthi bahlasele amalunga amabandla ezombusazwe aphikisa eleZanu PF.
ULovemore Chinoputsa, unobhala wabasakhulayo ku MDC – T ekhokhelwa nguChamisa, uthi abasakhulayo kumele bathole ithuba lokuthi bazimele bengehlukaniswa yikuthi bakholwa kuliphi ibandla.
Lokhu kugcizelelwe ngosakhulayo ohlala eHarare, uMnu. Lancyott Mpofu, othi abatsha basetshenziswa sonke isikhathi yinkokheli yamabandla ukuthi benze ubudlwangudlwangu.
Loba kulabanye abadonsela muva kumkhankaso lo, osakhulayo ofunda eHarare uBuhlebenkosi Dube uncome kakhulu imizamo yokuthi kuqhutshwe ukhetho kungelabudlwangudlwangu kwele Zimbabwe lonyaka.
UMalvin Mukudu, omunye njalo osakhulayo, uthi lelinyathelo lizanceda ikakhulu izizukulwana ezilandelayo ukuze zihambe ekukhanyeni.
Sokwabulawa abantu abanengi okumangalisayo abaphikisa elibusayo ngesikhathi sokhetho kusukela ilizwe lithola uzibuse ngomnyaka ka1980.