amalinks wokungena

Breaking News

Madinda Ndlovu: Sebedlala Kahle Abafana Bethu Abalungiselela Imidlalo yePSL


Madinda Ndlovu

Umqeqetshi weqembu le Highlanders, uMadinda Ndlovu, uthi okwamanje akakabi lendaba lempumela yemidlalo kodwa afuna ukukubona yikuba abafana bakhe bedlale bedonsa kanye kanye.

UNdlovu utshele intathelizindaba ngoLwesine emini ukuba indlela iqembu le Highlanders elidlale ngayo kumidlalo eseliyidlale selokhu liqale ukuphatheka kumidlalo eyokuzwana amandla iyamthokozisa kakhulu loba lingenelisanga ukunqoba.

“Sikhuthazwa kakhulu ngesikubonayo ukuba abafana bethu sebedlala njengabantu asebejwayelene. Impumela asikazihluphi kangako ngayo lokho kuzavela obala nxa sesiqale ukudlala imidlalo sincintisana lamanye amaqembu.

“Okusalayo yikuba abafana baqhuba kuhle njalo ngileqiniso ukuba bazabe sebelungele ukudlala ngesikhathi kuqala imidlalo yeligi.”

UMadinda wakha kakutsha iqembu le Highlanders ngemva kokuqhatshwa ekuqaleni komnyaka njalo iqembu leli ligcwele abadlali abasakhulayo kanye lalabo abangadumanga.

Ngesikhathi iqembu le Highlanders liqala ukudlala imidlalo eyokuzwana amandla uMadinda uveze ukuba udinga umgadli ololwazi lokudlala kusigaba saphezulu ozalihlohlela amagoli ngoba abagadli abasakhulayo abakuqembu leli bengekho bukhali.

UMadinda uthi balokhu bemdinga umgadli ozakwenza laba abasakhulayo babe lesibindi.

“Ukuba ngumgadli akukho lula ngoba umuntu okhuthayo uyabonakala kakhulu kulalowo omakayo emuva ophongukhaba kuphela ikanti phambili ngale ungakhutha abantu bayakuhlolisisa. Yikho ke sidinga umgadli ongabuya azoqedisa amathuba esiyabe siwathola ukuze laba abancane labo beqale ukuzithemba.”

Iqembu le Highlanders selike ladlala imidlalo yokuzwana amandla lamaqembu abalisa ele Talen Vision, ele Nichrut kanye lele Chapungu ikanti ngeSonto lizadibana lele Chicken Inn emdlalweni we semi – final eyomncintiswano we ZNA Commanders’ Charities.

Facebook Forum

XS
SM
MD
LG