amalinks wokungena

Breaking News

Abadlali Abalodumo Batshengisela eHarare Bekhonona Ngokuphathwa Kubi Kwama Mighty Warriors


Iqembu leMighty Warriors litshaya eziwayo ...

Ababedlala umdlalo wenguqu kanye labangane babo batshengisele ngoLwesihlanu edolobheni leHarare besola indlela iqembu labesifazane elimela ilizwe emdlalweni wenguqu eliphathwa ngayo yinhlanganiso eqondisa umdlalo wenguqu elizweni eye Zimbabwe Football Association (ZIFA).

Abatshengisele emahofisini enhlanganiso yeZimbabwe Football Association ngababalisa uHarlington Shereni ikanti bekukhona njalo ababeyiziphathamandla zamaqembu atshiyeneyo elizweni abagoqela uAbel Sibanda.

USibanda uthe yena inkinga ezibhekane leqembu le Mighty Warriors zisukela ekutheni umdlalo wenguqu ukhokhelwa ngabantu abangazange badlale ibhola.

“Sizokhala ndawonye lamankazana, abantwabethu asebehlukumezwe kakhulu. Inkinga ekhona yikuthi abantu abakhokhela umdlalo webhola akusibo bantu bebhola yikho sekumele badedele abantu abalidlalayo ibhola abakwazi ubuhlungu bokudlala ibhola balikhokhele sibone.”

Omunye ophatheke kulokhu kutshengisela Zipho Ngezipho Ndebele uthi isiphatho sabadlali abamela ilizwe emdlalweni wenguqu kumele sifane kungakhathalekile ukuba ngabesilisa kumbe ngabesifazane.

“Nxa sikhangela iqembu leli liqembu elidlale okwedlula wonke amaqembu akweleZimbabwe njengoba kuyilo lodwa elahamba layadlala kuma Olympics kodwa indlela abaphathwa ngayo akusiyo njalo sikhangelele ukuba bephathwe ngendlela efananayo labobaba ngoba nxa ama Warriors esiyadlala aphathwa ngcono kakhulu. Sifisa ukuba bephathwe ngokufanayo ngoba lokhu abakwenzayo bayabe bemele ilizwe yikho kumele bebuyele emakhaya bephethe okukhangelekayo.”

Kusenjalo kubekhona iziqhwaga zamadoda ezivimbele abatshengiselayo laba ukuba batshiye incwadi abayilobele inkokheli yeZifa eZifa House zayithatha zona zathi zizayipha umkhokheli we Zifa uPhilip Chiyangwa.

Sikhangele umdlalo wenguqu: Kusigaba se Castle Premier Soccer League.

Imidlalo yeviki lesihlanu iqale ngoLwesihlanu emini lapho iqembu le Black Rhinos elibe ngutshiki lobhanqa 0-0 lele Chapungu esigodlweni iHarare.

Imidlalo iqhubekela phambili kusasa lapho iqembu le Mutare City elizadibana khona lele Bulawayo Chiefs eVengere, iqembu leFC Platinum lizadlala lele Harare City eMandava, abafana be Herentals bazadibana leBulawayo City eRufaro kuthi ele Nichrut lizemukela ele ZPC Kariba eAscot.

NgeSonto iqembu leTriangle lizangqikilana lele CAPS United, iqembu leShabanie Mine lizadlala lele Ngezi Platinum Stars, iqembu le Dynamos lizadlala lele Yadah kuthi iqembu leChicken Inn lizangqikilana lele Highlanders enkundleni yeBarbourfields.

Udaba Esilethulelwe NguJoseph Njanji
please wait

No media source currently available

0:00 0:02:24 0:00

Facebook Forum

XS
SM
MD
LG