amalinks wokungena

Breaking News

Abantu Bachothoza uNaka Morgan Tsvangirai Othethise Umalukazana Emphakathini


Unaka Morgan Tsvangirai uthethise umalukazana esithi engabuyi emfeni yomntanakhe.
Unaka Morgan Tsvangirai uthethise umalukazana esithi engabuyi emfeni yomntanakhe.

Ukubhubha kukaMnu. Morgan Tsvangirai sokuveze ukuthi bekungelakuzwanana phakathi komdeni wakhe lonkosikazi wakhe uElizabeth.

Kubemqoka ukuthi unina kaTsvangirai lomalukazana wakhe ababonani ngemva kokubana ethe uzazibulala ngokuzibophela nxa umalukazana wakhe uElizabeth lalowo osaphethe isikhundla sikamongameli kubandla leMDC, uMnu. Nelson Chamisa, bengabuya emncwabeni womntanakhe uMorgan.

Umama kaMorgan Tsvangirai obhubhe ngeviki ephelileyo ngomkhuhlane wemvukuzane, ugogo Tsvangirai wethuse abantu abanengi ngenkulumo yakhe engajayekelanga esintwini.

UNkosazana Thandekile Mgutshini, isizalwane seZimbabwe esihlala kwele Bhilithani, uthi akumangalisi okwenziwe ngumama kaTsvangirai.

UNkosazana Mgutshini uthi kwamehlela laye okwehlele uNkosikazi Tsvangirai.

“Into eyenzakale kumfazi kaTsvangirai ibuhlungu, kodwa akumangalisi ngoba vele umhlobo lo yiyo into yabo. Lami nginje kwake kwangivelela ngoba ngangendele eMurehwa umkami uthe esebhubhile bangixotsha njengenja bangithathela yonke into ngaphuma nje ngiyimi ngihamba labantwabami yikho kwaze kwangenza ngabaleka ngazengabuya ngazoqalisa impilo yami kutsho eEngland.”

UTsvangirai uzabekwa ngoLwesibili eBuhera esabelweni seManicaland.
UTsvangirai uzabekwa ngoLwesibili eBuhera esabelweni seManicaland.

Abantu abanengi bayazibuza ukuthi pho inzondano yakhona ivela nga, uNkosazana Thubelihle Dube, uthi abantu bangaqali ngokusola ugogo lemuli kaTsvangirai ngesenzo sabo lesi, ngoba kungenzakala ukuthi balesizatho esibenza benzenjalo.

“Mina ngibona engani indaba le yakoTsvangirai asiyonto esingathi siyingenele. Kukhanya engani kukhona okukhona, abantu abasoze baqalise ukuxabana umuntu esethule. Ngibona engani kukhona okungabe kukhona bona abakwaziyo thina esingakwaziyo. Nxa singalinda sizwe ukuthi kungabe kuhambe njani kodwa hayi kukhanya kukhona indaba ekhona.”

Kungenzakala ngempela ukuthi bekuvele kulwiwa emulini kaTsvangirai engakafi kodwa abanye bakubona kungasibuntu lokho.”

Lokhu kugcizelelwe nguNkosazana Khethiwe Nkomo othi okwenziwe kuElizabeth Tsvangirai kubi kakhulu.

“Mina ngithi noma kulendaba engabe iphambanisekile kuTsvangirai lomfazi wakhe kumele bamyekele umfazi kaTsvangirai angcwabe indoda yakhe ngoba isikhathi sonke lesi besikubona ukuthi umfazi kaTsvangirai nguye okade eseduzane loTsvangirai isikhathi sonke. Kutsho ukuthi uTsvangirai yena ubemthanda umfazi wakhe ngesifiso sakhe ubengafisa ukuthi abekhona emncwabeni wakhe.

“Njalo indaba le ekamamakhe asikwazi ukuthi umamakhe yena kuyini akucabangayo but bangakubeka eceleni lokho bencwabe umuntu. Wonke umuntu abele chance yokuvalelisa uTsvangirai njengokuba kade bekhona ezimpilweni zakhe, mina ngibona kanjalo.”

Ihlazo lokuzwa amazwi anje mhla kufiwe kujwayelekile kweminye imihlobo eZimbabw. Kubalokujikelana inyoka iphila ngesinye isikhathi kutshaywane, kulinyazwane kubangwa izinto ezitshiyeneyo.

Okuhluphayo njalo yikuthi isigigaba leso senzakale emfeni yomuntu oyinkokheli edume kakhulu emhlabeni wonke njalo ethandwa ngabantu abanengi enjengo Tsvangirai.

XS
SM
MD
LG