Abantu abanengi okumangalisayo bathe gwaqa eZimbabwe Grounds eHarare ngoMgqibelo lapho okubunjwe okusemthethweni umanyano wamabandla aphikisa elibusayo obizwa ngokuthi yiMDC Alliance.
Inkokheli yomanyano lo ebalisa uMnu. Morgan Tsvangirai (MDC-T), Welshman Ncube (MDC), Tendai Biti (People’s Democratic Party), Jacob Ngarivhume (Transform Zimbabwe), Agrippa Mutambara (Zimbabwe People First) labanye balobelane isivumelwano lesi phambili kwenkulungwane ezimangalisayo zabantu.
Inkokheli le ithe kuyathembisa ukuthi bazasusa ibandla lika Mongameli Robert Mugabe embusweni kukhetho oluzakwenziwa ngomnyaka ka2018.
UTsvangirai uthe, “Siyenze lokhu ngoba lakhuluma ngakho lakhonona ngokuthi simaqamuqamu. Sesihlangene njalo simelele ukuthi banengi abazabuya kumanyano lo. Sizalikhipha embusweni ibandla leZanu PF.
“Sizama ukuthi sonke sibe lempilo engcono kulalokhu elikubhekileyo ngaphansi kombuso webandla le Zanu PF.”
Abanye abakhulume emphakathini batshele uzulu ukuthi kumele abantu babhalise ukwenzela ukuthi bavote kukhetho oluzayo.