amalinks wokungena

Breaking News

Isigodlo seMelika eZimbabwe Sisekela Okunye Okukhulunywe NguMugabe


UN-ASSEMBLY/Mugabe
UN-ASSEMBLY/Mugabe

Abewofisi yommeli wakwele Melika eZimbabwe bathi bavumelana lamazwi kaMongameli Robert Mugabe awethule emhlanganweni weUnited Nations General Assembly ngoLwesine lapho akhuthaze khona amazwe omhlaba wonke ukuba abosebenza ndawonye ukuze alethe ukuthula.

Iziphathamandla lezi ziveze njalo ukuba zivumelana njalo lenkulumo kamongameli wakwele Melika, uMnu. Donald Trump, eyokuxwayisa abamazwe abalisa ele North Korea lele Iran ethi azojeziswa kanzima nxa ezoqhubeka ngemisebenzi yawo ephazamisa ukuthula emhlabeni wonke jikelele ngokulungisa izikhali ze nuclear.

Emazwini akhe awethule emhlanganweni womanyano wamazwe omhlaba we United Nations General Assemby, uMongameli Mugabe uhlasele inkulumo kamongameli wakweleMelika uMnu. Trump, amfanise lo Goliathi waseBayibhilini, ngoba ethusela ele North Korea lona elingumngane weZimbabwe.

Ele North Korea yilo elalolonga ibutho le Gukurahundi.

Isiphathamandla emawofisini ommeli wakwele Melika obona ngobudlelwano lozulu, UMnu. David McGuire uthi kunengi okukhulunywe nguMugabe abakhangelele ukuba kulakho ukuphathisa kwezokusebenzelana phakathi kwamazwe womabili lamanye amazwe.

Kodwa uzulu weZimbabwe uyisole kakhulu linkulumo kaMugabe yokuthuka inkokheli zakwamanye amazwe ethi ngoba yena laye engekho msulwa kwezokwephulwa kwamalungelo oluntu.

Uzulu uthi uMugabe wehluleka khona ukumanyanisa abantu elizweni lakhe abeseqeda isikhathi esinengi lamandla ache ethethisa abanye abantu kulokuthi alungisise inkinga ilizwe elibhekane lazo.

UNkosikazi Evylen Tachuana, elinye lamalunga womkhandlo iMDC National Executive Council, owebandla le MDC elikhokhelwa nguProffessor Welshman Ncube, uthi makatshiyane lokuba mbaxambili uMongameli Mugabe.

UTachuana uthi uMugabe makangabi nguye okhuluma ngezokuthula okungekho elizweni aselibuse okweminyaka phose amatshumi amane.

Abasakhulayo labo bayisole kakhulu inkulumo kaMugabe lanxa bevumelana labekutsho kwezokuthula lomanyano umhlaba wonke okwenzakala elizweni le Zimbabwe. Omunye wabo nguTatenda Moyo.

UMoyo usole ukwenza kuka Mugabe esithi uye kulomhlangano ezenza umlamlankunzi welizwe le North Korea endaweni yokuyakwethula okungasiza ilizwe lakhe.

Abanye abakhulumisane lalumsakazo bathi abamangaliswa yikwenza kukamongameli Robert Mugabe osengohlezi esebenzisa ithuba leli emhlanganweni weUnited Nations ukuthuka ezinye inkokheli yabakwamanye amazwe kulokwethula amazwi akha isizwe.

XS
SM
MD
LG