UMongameli Mugabe ubekwele South Africa lamhlanje emhlanganweni wokulobelana izivumelwano zokudlelana kwamazwela womabili owe South Africa-Zimbabwe Bi-National Commission.
Lokhu bekuyikwethekela kwakuqala ngemva kokuphiwa kuka Nkosikazi Grace Mugabe isivikelo ukuze angabotshwa ngecala lokutshaya owesifazana wakweleSouth Africa.
UNkosikazi Mugabe yena obhekane laleli cala elisemthethwandaba kwele South Africa ubengekho.
UZuma loMugabe basitshaye indiva isehlakalo esanyikinya ubudlelwano bamazwela womabili ngemva kokuba unkosikazi Mugabe wacina esebhekane lokubotshwa ngecala lokutshaya unkosazana Gabriella Engels. Bobabili bancome kakhulu ubudlelwano bamazwe abo bathi buhle njalo buyathuthuka.
Ngemva komhlangano inkokheli lezi zombili zibhalelane izivumelwano ezinhlanu kwezamandla kagetsi, ezemvelo, ezemibiko kanye lezemidlalo.
Enkulumeni yakhe umongameli Zuma uthe ubudlelwano beZimbabwe leSouth Africa bukusimo esihle kakhulu.
“Siyasuthiseka kakhulu ngentuthuko yobudlelwano bamazwe ethu omabili. Lokhu kukhonjiswa yizivumelwano ezingamatshumi amane ezikhona phakathi kwamazwe ethu womabili.”
Umongameli Mugabe yena uchaze iSouth Africa njengomakhelwana olungileyo.
“Kulesitsho esithi umuntu angazikhethela umngane kodwa akenelisi ukuzikhethela umakhelwana wakhe. Kodwa ngithanda ukuthi aluba besiphiwe ithuba lokukhetha umakhelwana besivele sizakhetha iSouth Africa.”
Kodwake ukungabikhona kukankosikazi Mugabe kutshiye umbuzo wokuthi ngabe ngeqiniso ubudlelwano beZimbabwe leSouth Africa buqinile yini. Akuvamanga ukuthi umongameli Mugabe atshiye umkakhe nxa esethekelela amazwe.
NgoNcwabakazi uNkosikazi Mugabe utshaye uNkosazana Gabriella Engels ngesikhathi emthola elabantwabakhe abangabafana abahlala eJohannesburg.
UNkosazana Engels wamangalela uNkosikazi Mugabe emapholiseni, uhulumende weSouth Africa waze wamupha isivikelo sokuthi angabotshwa. Bona lomongameli Mugabe basuka kwele South Africa emadabukakuza elanga lokucina lomhlangano weSADC owawuse Pretoria.
Okwamanje uNkosazana Engels usekhweze loludaba emthethwandaba efuna ukuthi lesisivikelo sikhitshwe ukuze ma angangena kweleSouth Africa abotshwe. Umthethwanda ukhangelelwe ukwethula isinqumo sawo ngaloludaba loba yinini.
Le yinto umongameli Mugabe angazange ayinake ngesikhathi esethula inkulumo yakhe.
“Ngithokoziswa yikuthi sikhethe ukusebenza ngokubambisana, ukukhulumisana, lokwenza izinto ndawonye ukuze sonke sibelekusasa efanayo.”
Ucine ngokutshayela umongameli Zuma ihlombe ngokuthatha intambo zokuba ngumgcinisihlalo wenhlanganiso ye SADC wathi akathandabuzi ukuthi uzasebenzela inuthuko yamazwe onke asezansi yezwekazi le Africa.
