amalinks wokungena

Breaking News

Nelson Chamisa: Izizalwane zeZimbabwe Ezihlala Kwamanye Amazwe Kumele Zibuyele Ekhaya Lonyaka


UMnu. Nelson Chamisa usemhlanganweni oqoqwe libandla lakhe edolobheni leBedford kwele Bhilithani.
UMnu. Nelson Chamisa usemhlanganweni oqoqwe libandla lakhe edolobheni leBedford kwele Bhilithani.

UMongameli webandla leMDC-T uNelson Chamisa, owethekelela kwele Bhilithani, uthi ibandla lakhe linganqoba kukhetho oluzayo zonke izizalwane zeZimbabwe ezafundela imisebenzi etshiyeneyo zizacelwa ukuba zibuyele ekhaya ukuyancedisa ukwakha kutsha ilizwe.

Ekhuluma phambi kwabantu abadlula inkulungwane eBedford kwele Bhilitani izolo ntambama, uMnu. Chamisa uthe ibandla leMDC-T Alliance selilungisa ugwalo lokubhala phansi amagama abantu bonke abahlala kwamanye amazwe.

Esekhuluma ngokhetho oluzayo, uChamisa uqhubekele phambil esithi iMDC-T Alliance ngeke ingene kukhetho nxa uhulumende kaMongameli Emmerson Mnangagwa engavumanga ukuthi izizalwane zeZimbabwe ezingaphandle kwelizwe zivunyelwe ukuvota.

Abantu abanengi bajabulele amazwi kaChamisa. Omunye wabo nguMnu. Nhlanhla Dube, ongalandeli ibandla leMDC-T, obelande ukuzobona lokuzokuzwa amazwi okuzakwethulwa nguChamisa.

“Ngimzwile ekhuluma l think he has got a potential as long as he is able to embrace everyone in Zimbabwe ngoba issue yami engilayo yikuthi ipolitics yeZimbabwe l think people tend to belong to certain parties, certain tribes, mina ngifuna a leader who embraces everyone.”

Kulabanye abathandabuza ukuthi uChamisa uzanqoba ibandla leZanu PF. UNkosazana Nozizwe Ndlovu uthi uChamisa kumele akhohlwe aphinde ukuthi enganqoba iZanu PF kukhetho oluzayo.

“UChamisa mina l don’t think ulechance yokuthi angaya stand up to iZanu simple because mina ngokwami l felt ukuthi ube one side like mina angizange ngimuzwe ekhuluma ngeSiNdebele so it made me feel l was kind of left out. l don’t think umela amacommunity wonke arepresenter iZimbabwe.”

UChamisa wethekelela kwele Bhilithani lapho anxuswe khona likolitshi lemfundo ephezulu eleUniversity of Oxford. Ukhangelwele ukuthi uzakwethula akumumetheyo kuzifundi zekolitshi leli, ikakhulu mayelana lezombusazwe lokhetho oluzayo kwele Zimbabwe.

Udaba Esilethulelwe NguEzra Tshisa Sibanda
please wait

No media source currently available

0:00 0:02:57 0:00

XS
SM
MD
LG