Umkhokheli webandla eliphikisayo ele MDC, uMnu. Nelson Chamisa, uthi ibandla elibusayo lizehluleka ukuphambula ukhetho lweMDC ngesikhathi seCongress ezakwenziwa lonyaka ngoNkwenkwezi.
UChamisa utshele intathelizindaba eHarare ngoLwesithathu ukuthi iZanu PF izalahlekelwa yimali eyiqoqileyo ukuthi iphambanise umhlangano webandla leMDC lapho okuzakhethwa khona umongameli omutsha leyinye inkokheli.
UChamisa wethule lokhu ngesikhathi kulemibiko ethi unobhala webandla leli uMnu. Douglas Mwonzora ufisa ukuncintisa kukhetho lukamongameli.
Uthe ibandla leZanu PF lizakwehluleka ukukhethela uzulu inkokheli.
“Bengabeka imali yokuyenga abanye bethu kodwa asilandaba lakho lokhu, esikufunayo yikuthi silungisise inkinga ilizwe elibhekane lazo. Abantu abaku MDC abahlanyi, bayakwazi abakufunayo njalo bahlonipha inkokheli zabo lakho liyazibonela inkokheli ezilobuqotho ezilapha ngakho-ke asesabi konke abangafuna ukusilinga ngakho kodwa esingakufuniyo yikuthi babe lemali yokufuna ukusixabanisa ngoba akusoze kusebenze,”
UChamisa uqhubeke ethi ibandla leli lizaqhubekela phambili ngokhetho lwalo kodwa wengezelela esithi bamangele ngendlela ibandla leZANU PF elikhanya liphatheke ngokwenzakala ebandleni labo.
Uphinde wathi inkokheli ezifuna ukuncintisa kulolukhetho kuzafanele ziqale zikhethwe eziqintini zonke zelizwe zingakayi kumncintiswane welizwe lonke owe National Congress, njengalokho okumunyethwe yisisekelo sombuso sebandla.
Lokhu kugcizelelwe ngumsekeli kamkhokheli walelo bandla uProfessor Welshman Ncube, laye obekhona emhlanganweni lo. UNcube uthe inkokheli zonke ezifisa ukuncintisa kuzikhundla ezitshiyeneyo zebandla le MDC kuzamela zilandele lokhu okutshiwo yisisekelo sombuso walelo bandla okuyikuqala ngokukhethwa eziqintini.
“Okwakuqala okumele sibekwazi yikuthi kulesisekelo seMDC esisitshengisa ukuthi indlela yokuya kuCongress ihanjwa njani. Sesivumelene njengoba besihlangene namhlanje njenge Standing Committee ukuthi sonke sizalandela leyo ndlela. Leyo ndlela iqakathekisa ukuthi thina njengabakhokheli asizikhethi, siyamelela izigaba zikhethe kodwa singakafika kuzigaba kumele siqala siyekhethana kuziqinti besesibuya ke kuzigaba, abatsha abayabe bekhethwe kuzigaba sekuzamele ke bayencintisa kuNational Congress.”
Lumhlangano uza ngemva kokuba kubikwa sekulokungezwani phakathi kwenye inkokheli efuna ukuncintisa kusikhundla sobukhokheli.
Kodwa uNcube uthe akula kudonselana njengalokho okukhulunywa ngabanye ngoba umumo okade usemhlanganweni weStanding Committee ubumuhle kakhulu.
Kodwa ingcwethi kwezombusazwe uMnu. Tjenesani Mutungagwa uthe kubuhlungu ukuthi ibandla eliyilo elithembisa umbuso kazulu likhanya lisehluleka ukwenza ukhetho olukhululekileyo olubonakala ngokuthukwa kwalabo abafisa ukuncintisa ubukhokheli balelo bandla.
Lokhu uMutungagwa uthi kwenza kusale kungasela mehluko phakathi kwebandla le MDC leZanu PF.
Uhlangothi lwabatsha kanye lolwabesifazane lwaleli bandla seluveze usekelo lwalo kuChamisa. Kufunakala isigaba esisodwa nje kuphela ukuthi siqambe igama lomuntu ukuze angene kukhetho.
