UMnumnzana Nkosana Moyo owake waba ngumphathintambo wezokulungiswa kwempahla lokuthengiselana kuhulumende weZanu PF, usephume mgceke ngokufuna ukungena kukhetho lokukhetha umongameli oluzakwenziwa ngomnyaka ozayo.
UMoyo usesungule umkhankaso olesihloko esithi "Nkosana Moyo for President 2018" kusetshenziswa inkundla zebulenjini ngaphansi kwendikimba ethi #RunNkosanaRun.
Inhlanganiso ebona ngezokuvota iZimbabwe Electoral Commission iphakathi kokwethula imibiko yokukhuthaza abantu ngokuqakatheka kokubhalisa ukuba lelungelo lokuvota.
Kumaviki ambalwa adluleyo, uMoyo uke waphatha kancane ngesifiso sakhe sokufuna ukungena kukhetho engela bandla lezombusazwe alimeleyo.
Sokulandelwe ngumkhankaso lo ophuma enkundleni zebulenjini kodwa oveza ukuthi uMoyo kasuye owusunguleyo kodwa ungowokukhuthaza ukuthi ancintise kukhetho.
Imibiko le ikhuthaza abantu ukuba basekele uMoyo ebulenjini, banxusane bamsekele kuthi abenelisayo bamlobele manqamu kukhasi leFacebook @Nkosana2018.
Olwela amalungelo oluntu, uMnu. Mbuso Fuzwayo, uthe kuyajabulisa ukuba lomuntu onjengoMoyo ofisa ukuphatheka kukhetho.
Isikhulumi seZapu, uMnu. Iphithule Maphosa, uthe kuhle ukuba uMoyo ufisa ukuncintisa ngakho-ke bamfisela inhlanhla.
Kodwa-ke uthe kwele Zimbabwe kukalutshwana ukuthi umuntu ozimele yedwa anqobe ekhethweni.
UMnu. Thomas Sithole, isakhamuzi sakoBulawayo, uthe uMoyo njengesizalwane seZimbabwe esilamalungelo aso njengabanye bonke, wenze into enhle yokuthi laye aphosele elakhe igama kungwane yabafisa ukucintisa ngoba kulakho ukunikeza idlabuzane kwabanye.
Kumaviki ambalwa adluleyo kuke kwaba lemibiko ephuma kubafundisi ethi iZimbabwe ilakho ukubuswa ngumuntu osuka phandle kwelizwe, osekutshiye abantu bethiye indlebe ukuthi uMoyo yena uhamba ngaluphi unyawo.
