amalinks wokungena

Breaking News

Nkosana Moyo: Abantu Kumele Bakhethe Umongameli Omutsha Ozabamela


UDokotela Nkosana Moyo ukhuluma labatsha eHarare ...
UDokotela Nkosana Moyo ukhuluma labatsha eHarare ...

Umgcinisihlalo womanyano weAlliance for the People's Agenda, uDr. Nkosana Moyo, uthi ikusasa yelizwe, isezandleni zabasakhulayo abayibo abanengi eZimbabwe abalamandla okuguqula isimo loba hatshi ngokukhetha inkokheli uqobo kumbe ezingazi umsebenzi.

Abasakhulayo bona bathi bafuna umkhokheli ozayo kube ngumuntu ozinikele ukusebenzela uzulu, aqede udubo lokungathembeki njalo abe ngolalela okuvela ebantwini hatshi obusa ngocuku.

Le ngeminye yemibono ephume emhlanganweni uDr. Moyo awenze labasakhulayo obuphansi kwesihloko esithi ‘MEET THE YOUTHIEZ’, endaweni eyaziwa ngokuthi yiMoto Republik eHarare.

Uluhlu lwenkokheli ezizongena ezikhundleni ngemva kokhetho luka 2018, uMoyo ethi kuzamele ibe ngevela kibo abasakhulayo okuzokhombisa ukuba ilizwe liyakuphi.

UThamsanqa Khumalo, omunye wabasakhulayo obekhona laye kulomhlangano, uthe kuqakathekile kuba kukhethwe inkokheli edlelana lozulu.

UAlexander Gusha uvumelane laye esithi ufisa uzulu weZimbabwe kakhulukazi abasakhulayo njengaye, akhethe inkokheli uqobo.

UGusha uthi ubona ingani uMoyo nguye ongcono okwamanje phakathi kwasebetshengise ukuncintisa isikhundla sika mongameli kukhetho luka 2018.

UMoyo uthi sekukibo abasakhulayo, ukukhetha inkokheli uqobo loba hatshi ngoba konke kusemandleni abo.

Uthe kumele uzulu weZimbabwe kakhulukazi abasakhulayo baguquke kundlela abenza ngayo izinto lapho bekhetha inkokheli, bakhangele ukuba uyisima kanjani lowo muntu hatshi ngoba ungowebandla liphi, umhlobo bani loba uvela kusiphi isigaba selizwe.

XS
SM
MD
LG