amalinks wokungena

Breaking News

Odokotela Batshayela Ihlombe Uhulumende Osevumele Ukuthi Kulinywe Imbanje eZimbabwe


FILE - Nanzi imbanje esilinywe okusemthethweni.

Ingcwethi kwezempilakahle zithi linyathela elihle elithethwe nguhulumende weZimbabwe osevumela ukuthi abantu bahlanyele imbanje yokuthengisa, eyokwelapha kanye leyokwenza uphenyo olutshiyeneyo oluhambelana lenzunzo yesihlala lesi.

Zithi imbanje yelapha imikhuhlane eyehlukeneyo.

Unobhala jikelele wenhlanganiso yabodokotela abalwela ilungelo loluntu, eye Zimbabwe Association of Doctors for Human Rights, uDr. Evans Masitara, uthi belivele selisalele muva eleZimbabwe kwezokusebenzisa insango okusemthethweni.

UDr. Masitara uthi kunengi okutholakala kules’isilimo okusiza ukwelapha izifo ezibalisa inhlungu ezedlulise amalawulo, ebantwini abengenelisi ukudla kuhle kanye lezifo ezitshiyeneyo zemvukuzane.

Lanxa uzulu weZimbabawe esemukela inyathelo likahulumende lokuvumela ukulinywa kwembanje ezosetshenziswa ukulungiswa kwemithi elizweni, ukhuthaza iziphathamandla ukuba zibeke imithetho leziqondiso ezilukhuni ukwenqabela ukusetshenziswa kwayo ngendlela engalunganga.

Omunye wabalombono lo nguNkosazana Sithabile Dladla othi ubesazi mpela ukuba imbanje kungumuthi olakho ukusiza abalezifo ezitshiyeneyo njalo uyalamukela ngenjabulo lelinyathelo likahulumende.

UMnu. Solomon Ndiweni, ohlala elokitshini leTshabalala koBulawayo, uthi uyalingcoma laye lelinyathelo eselithethwe nguhulumende ngoba lizosiza kakhulu ekulungisweni kwemithi eZimbabwe lanxa yena ubengazi ukuba ingumuthi.

Akwesabelayo uNdiweni yikubana uhulumende engaphetha esefaka imithetho ezokuba ngumgoqo njalo kwezokulinywa kwalesi silimo.

Kodwa-ke uMnu. Henry Mateo uthi akelemukeni lelinyathelo elithethwe nguhulumende ngoba imbanje iyingozi kuzulu.

Ngaphansi komthetho osanda kubekwa weStatutory Instrument 62 of 2018, ‘Dangerous Drugs – Production of Cannabis for Medicinal and Scientific Use Regulations’, uhulumende uvumele ukulinywa kwembanje ezosetshenziswa ukwelapha izifo ezehlukeneyo.

Ukuze ingaze yasetshenziswa ngendlela engayisiyo, umphathintambo wezempilakahle nguye ozoba lamandla wokutholisa amacence kulabo abafisa ukulima les’isilimo.

Ofisa ukuzolima imbanje kuzomele ahlawule inkulungwane ezingamatshumi amahlanu zamadollar - $50,000 - ukuthi athole imvumo yokulima les’islimo.

Udaba Lwembanje Esilethulelwe NguMavis Gama
please wait

No media source currently available

0:00 0:04:19 0:00

Facebook Forum

XS
SM
MD
LG