Inhlanganiso ye Pretoria Portland Cement Zimbabwe ithi izaqhubeka isipha usekelo lwemali kumjaho we Matopos 33 Miler loba nje kube lokukhonona phezu kwendlela umncintiswano walonyaka oqhutshwe ngayo ngempelasonto edluleyo.
Abaqoqi bomjaho we PPC Matopos 33 Miler basele bebhula umlilo ngemva kokuba sebechothozwa ngendlela umjaho we ultra - marathon oqhutshwe ngawo njengoba kube labadlali abayithoba munwe munye abakhalale ukugijima kumncintiswano we PPC Matopos 33 Miler ngoMgqibelo.
Lokhu ngemva kokuba abadlali abafika amatshumi amathathu lanye belahlwe yimota obekumele ibakhokhele banhlanhlatha beqonda phakathi kwendawo egcinelwa inyamazana eye Matopos National Park bona kumele bephume beqonda edolobheni lako Bulawayo.
Kuthe sekunanzelelekile ukuba sebelahlekile umtshayeli wemota wathwala abadlali abangamatshumi amabili lambili wayabatshiya phandle kwe park emgwaqweni oqonda koBulawayo okuyisenzo esidale ukuba abalandeli bomdlalo wokugijima bethi impumela yalumjaho ibingaseyiyo eyeqiniso ngoba abadlali beke bagada imota.
Umgcinisihlalo wenhlanganiso ye Bulawayo Athletics Board okuyiyo eqoqa lumncintiswano we PPC Matopos Ultra Marathon, uManuel Mpofu, uthi balibonile iphutha labo njalo bazaqondisa lapho abaphazamise khona.
“Sihlole indlela obekugijinywa kuyo laye umtshayeli wemota yikho angazi usuke walahleka njani. Sesibonga ukuba abadlali abajwayele ukunqoba yibo abanqobileyo njalo ngoba aluba kunqobe omunye ongazake enqobe labana abajwayele ukunqoba bebezakhonona bethi baphazamiswe yikuba bake balahleka. Njengenhlanganiso ye BAB sesikubonile ukuqakatheka kokuba sifake abantu ababili emoteni eyabe ekhokhela abadlali ibakhomba indlela.”
Isiphathamandla senkampani ye Pretoria Portland Cement, iPPC ngamafitshane, okuyiyo esekela umncintiswano lo ngemali, uKelebone Masiyane, uthe bazaqhubekela phambili besekela ngemali loba nje kubelengxaki lonyaka.
“Siyakunanzelela ukuba nxa kuthe kwaba lokuhlangana okukhulu kangaka kulakho ukuba lamaphutha lapha lalapha. Khonokho kungabe ngokunye okwenzakeleyo kodwa njengabaqoqi bomncintiswano siyahlala phansi sicubungule ukuba kuyini okuthethe indawo njalo ngilethemba elokuba ngomnyaka ozayo kuzakuba ngcono.”
Onqobe kucele labesilisa kumjaho we 33 miler ngu Lyno Muchena okunguye onqobe njalo nyakenye ikanti endaweni yesibili bekulo Andrew Chimbidzikai kuthi endaweni yesithathu bekulo Peter Tumbare.
Kucele labesifazane kunqobe uLizzie Chokore kuthi uSamukeliso Moyo yena uqede esendaweni yesibili ikanti onqobe nyakenye u Monica Kativhu uphutshe esendaweni yesithathu.
Ekhuluma ngemva komjaho uMoyo uthe yena usebenza gadalala ukuze ayenelise ukwala elokhu encintisana labasakhulayo.
“Umdlalo ubukahle into nje yikuthi mina sengigugile. Angilali, njalo nxa laba abasakhulayo bezilolonga kanye ngosuku mina kumele ngizilolonge kabili ukuze ngale ngingumdlali wezinga laphezulu.”
UMoyo uleminyaka engamatshumi amathathu lantathu eyokuzalwa njalo uthi uzakwala elokhu encintiswa nxa umzimba wakhe ulokhu usamvumela.
Umncintiswano walonyaka owe PPC Matopos 33 Miler ungenwe ngabadlali abedlula inkulungwane elamakhulu amabili abaphatheke kumijaho egoqela owe 33 miler, owe 21 km, owe 10 km kanye lowe 5km Fun Run.
Nyakenye kwakulabadlali abafika phose amakhulu ayisithupha abangena kulumncintiswano.
