amalinks wokungena

Abathatha Impentsheni Kabatholi Imali Ngemfanelo


Inengi labathatha impentsheni kabatholi imali yabo ngemfanelo.

Inengi labantu abakupentsheni eZimbabwe kabatholi imali yabo ngemfanelo osokusenza ukuba baphile nzima njalo bengenelisi ukuya ezibhedlela.

Inengi labo seliphathekile emzimbeni kuthi labo abatshiya umsebenzi ngokulimalela labo abatholi mali ngendlela efaneleyo, lezibhedlela azibelaphi ngoba kabala mali.

IZimbabwe ibhekane lodubo lokuwa komnotho okubi osekubangele ukuba labo abathatha impetsheni baphile njengabayanga.

Ikhomishini ebona ngamalungelo oluntu, iZimbabwe Human Rights Commission, isibike ukuba isithole incwadi ezimbalwa eziveza ukukhonona kokungatholi imali zempentsheni lokuqlilibezelwa nxa sekumele baphiwe imali.

UKhomishina Japhet Ndabeni-Ncube uthe ngempela bayathola imbiko yabantu bekhonona ngokungaphwathwa kahle lapho sekumele baphiwe imali zempentsheni.

Ukhuthaze abantu ukuba baze bazomangalela amankampani angaphathi kuhle abantu kanye lalawo mankampani ayethatha imali yabantu bathi nxa sebefuna ukwelatshwa kuthiwe kabaselamali.

UMnu. Japhet Steven Moyo, owayesebenzela inkampani kaloliwe wamiswa umsebenzi ngemva kokulimala kakhulu ngesikhathi izitimela zingqikilana ngo1994 enjanjini yeRutenga Beitbridge eLasante Siding, uthe lokhe watshiya umsebenzi kakatholi mali njalo uLoliwe kazange emelaphise.

UMoyo ukhale ngemali yakhe engasathengi lutho esithi ngemva kokulimala kwakhe imali okumele ayithole kuLoliwe ngamadola angamatshumi amabili lasifica minwe mibili njalo kasaboni, uyaqhula, waqamuka lethambo elijeka intamo.

Ngemva kokunanzelela ukuba kaphathwakahle, uMoyo waphanyeka udaba lwakhe emthethwandaba weHigh Court lapho atholelwa igqwetha kungela mbadalo ukuze udaba lwakhe lucwayisiswe athole imfanelo zakhe.

Igqwetha elimele uMoyo ele Danziger and Partners Legal Practitioners, uMnunzana Pasipanodya Mukono, uvumile ukuba idale lamupha amandla ukuba acwayisise udaba lukaMoyo lokungaphathwa kahle kanye lokungatholi imfanelo zakhe.

Uthe ngeke akhuluma okunengi kungaphazamisa ukucwayisiswa kodaba lukaMoyo njalo bakhangelele ukuya edale maduze.

Isikhulumeli senkampnai kaLoliwe eye National Railways of Zimbabwe, uMnunzana Martin Banda, uthe kalotshelwe imbuzo mayelana lodaba lukaMoyo ukuze aphendule njalo ubesemhlanganweni.

Uthemsise ukuba uzaphendula ngocingo nxa engaphuma emhlanganweni.

Inkampani yeNRZ ngeyinye yamankampani esebenza nzima, izisebenzi aziholi, kuthi labathatha impentsheni abaholi ngesikhathi njalo abanye babo abaseyelathswa esibhedlela senkampani.

Kulinyanga inengi labathatha impentsheni alikaholi batshelwe ukuba imali iye kudili lokuzalwa likamongameli ngakho bazaphuza ukuyithola.

Inkampani kahulumende ebona ngokugcina imali zezisebenzi eyeNational Social Security Authority layo iphakathi kokucwayisiswa kulandela ukuvela kwembiko yokungaphathi kahle imali yezisebenzi osekutshiye ukuthandabauza kulabo abathathelwa imali bekhangelele ukuyiphiwa sebekumpentsheni.

Facebook Forum

XS
SM
MD
LG