Abanye kwele Botswana bathi uhulumende wabo kumele adinge indlela engcono ekulungiseni udubo lwabangena kulelol’izwe okungekho emthethweni.
AbeZimbabwe, bexotsha ngumumo ongamanga kahle elizweni labo, baqhubeka bethululeka kwele Botswana noma nje bebotshwa njalo bebuyiselwa emuva, phose malanga wonke.
Udaba lokungena kwabadabuka eZimbabwe kwele Botswana okungekho emthethweni ludaba olusegudwini.
Amapholisa esigodlweni eGaborone asevuke eseganga kulez’insuku enganikezi ithuba abeZimbabwe abakulelo lizwe okungekho emthethweni.
Kodwa noma bangaze bethathwe yizimota ziyebachitha emngceleni wePlumtree, bayaphenduka ngokutshetsha.
Lokhu sekudale ukuthi inkokheli efana lokhansila webandla elibusayo eleBotswana Democratic Party, uMnu. Moemedi Mokgachane, ukuthi bakhuthaze uhulumende wabo ukuthi adinge amanye amacebo okuxazulula loludaba.
"Ngokubona kwami ohulumende kumele behlangane ukuze siyenelise ukulungisisa loludaba ngokupheleleyo ngoba ukubabuyisela emuva ngokwesikhatshana. Ubabuyisela emuva lamuhla, kusasa sebephendukile."
Ingcwethi kwezombusazwe, uMnu. Lawrence Ookeditse, uthi akukho okungalungiswa ngaphandle kokuba isimo eZimbabwe sintshintshe. Ugcizelele esithi abantu bazaqhubeka bebhensela ukubotshwa lokubuyiswela ekhaya.
"Uma amathuba kumumo womnotho engekho abantu bazaqhubeka besuka emazweni abo njalo awungeke wabamisa. Akumnandi ukuthi umuntu ayeqe umngcele, ekhonjelwe ngemibhobho lokunjalo kodwa ungabona umuntu ekwenza kutsho ukuthi imbhadalo yokwenza ingaphezu kokuthi angakwenzi."
Kulenz’insuku, amapholisa agcwele emigwaqweni yesigodlo iGaborone lapho amisa khona amabhasi lezinye izimota ezithwala izihambi, edinga abaselizweni okungekho emthethweni.
Kodwa omunye wabadabuka eZimbabwe ongelamaphepha awokuhlala elizweni, uthi ekhaya kunzima kungaphileki, yikho ebona kungcono ukungena kwele Botswana okungekho emthethweni.
"Ekhaya kusemalahleni okwakhathesi, ngakho kungcono ukuba seBotswana, sidlala umacatshelana lamapholisa. Akuhlaleki eZimbabwe."
UMnu. Andreas Sibanda, odabuka kwele Zimbabwe ohlala eGaborone, uthi ngabe uhulumende weBotswana uthatha inyathela elifana leleSouth Africa ukuthi anikeze abangalamaphepha aqondileyo okuhlala elizweni.
"Iminengi imsebenzi engafunwa ngabe Botswana, abeZimbabwe abangayithatha, esikhathini sokuthi kuchithwe isikhathi lemali bebuyiselwa emuva, abaphiwe amaphepha behlale okusemthethweni."
Emhlanganweni owenziwe phakathi kwayonale iviki, esinye isiphathamandla sikuhulumende, uMnu. Edwin Batshu, uthe eleBotswana lizaqhubeka libuyisela emuva abangalamaphepha okuhlala elizweni ngoba abanye badala amacala amanengi.